Қазақстан мен Пәкістан қылмысқа қарсы күрестегі ынтымақтастықты күшейтпек

Ішкі істер министрлігі әзірлеген құжатта терроризмге, есірткі қылмыстарына, адам саудасына, киберқылмыстарға және басқа да қылмыстарға қарсы бірлескен іс-шаралар мен ақпарат алмасу қарастырылған. Ынтымақтастық тәжірибе алмасуды, бірлескен іс-шаралар өткізуді және тергеу істерінде өзара көмек көрсетуді қамтиды.

– Жобаның мақсаты ҚР Үкіметі мен Пәкістан Ислам Республикасының Үкіметі арасындағы қылмысқа қарсы күрестегі ынтымақтастық туралы келісімге қол қою. Келісім Пәкістанмен қылмысқа қарсы күрес саласындағы ынтымақтастық үшін құқықтық негіз болады, – делінген хабарламада.

Құжат ҚР халықаралық шарттары туралы 2005 жылғы 30 мамырдағы заңның 5-бабының 2-тармағына сәйкес әзірленген.

Бұған дейін Ішкі істер министрлігі киберқылмысқа қарсы күрес саласындағы халықаралық ынтымақтастықты күшейту мақсатында «Киберқылмысқа қарсы Біріккен Ұлттар Ұйымының конвенциясына қол қою туралы» жобасы әзірленгенін жазғанбыз.

Еске сала кетейік, Қазақстан аймақтарындағы есірткімен байланысты жағдайға облыстар мен республикалық маңызы бар қала әкімдері жауапты болады.