Қазақстан мен Ресей шекарасында жүк көліктері кептеліп тұр ҰҚК түсініктеме берді

АСТАНА, 14 маусым – Sputnik. Қазіргі уақытта Қазақстан-Ресей шекарасындағы "Қосақ" (Павлодар облысы) өткізу пунктінде жүк көліктерінің кептелесі байқалады. Жағдай жеміс-жидек пен көкөніс өнімдерін тасымалдаудың маусымдық артуына байланысты, деп хабарлады Ұлттық қауіпсіздік комитетінің шекара қызметі.

"Күту уақытын барынша азайту үшін өткізу пункті күшейтілген режимде жұмыс істеп тұр, қажетті шаралар қабылдануда, сондай-ақ жергілікті атқарушы органдармен тығыз іс-қимыл ұйымдастырылды", - делінген хабарламада.

Шекара қызметі Павлодар облысында "Шарбақты" және "Үрлітөбе" халықаралық өткізу пункттері де жұмыс істейтінін еске салды. Солтүстік Қазақстан облысында "Жаңа Жол", "Қарақоға" және "Қызыл Жар" өткізу пункттері жұмыс істейді.

"Бұдан бөлек, белгілі бір күнге бос орындардың бар-жоғын нақтылауға және шекарадан өту уақыты мен орнын алдын ала жоспарлауға мүмкіндік беретін электрондық кезек жүйесі жұмыс істейді. Бұл өткізу пунктіне түсетін жүктемені азайтуға септігін тигізеді және тасымалдаушылар үшін процестің алдын ала болжамды болуын қамтамасыз етеді", - дейді шекарашылар.

Мысалы, "Қосақ" өткізу пунктінің шығу бағытындағы орташа өткізу қабілеті тәулігіне шамамен 200-220 жүк көлігін құрайды.

Қазіргі жағдайды ескере отырып, қозғалысты баламалы бағыттар арқылы алдын ала түзетуді сұраймыз, дейді шекара қызметі.