Қазақстан, Өзбекстан және Тәжікстан су шаруашылығын цифрландырады

Қазақстан, Өзбекстан және Тәжікстанның су ирригациясы жыл соңына дейін автоматтандырылып, цифрландыру жүйесіне қосылуы тиіс.

Қазір жобаның басым бөлігі аяқталып, техникалық негіздеме жасалып жатыр. 

Су өлшейтін құрылғылардың Қазақстанда бесеуі, Өзбекстанда бесеуі орнатылады. Мұның пайдасы: су бойынша ашық ақпарат алуға мүмкіндік туады. 

Биыл елімізде ирригациялық және дренаждық жүйелерді қалпына келтіру жұмыстары аясында 8,47 шақырым канал, 11,2 шақырым коллекторлық-дренажды жүйе жаңартудан өткен. Нәтижесінде 95 мың гектар алқапты суғаруға мүмкіндік туды. Қазір салада 14 ірі жоба іске асырылып жатыр.

Нұржан Нұржігітов, ҚР Су ресурстары және ирригация министрі: 

- Бүгінгі күні 10 гидровой поста автоматтандыру жүйесін енгіздік. Жылдың аяғына дейін техникалық негіздеме жасалады. Осы қараша айының соңында әріптестерімізбен кездесіп, келер жылғы жоспарды түзеп, жұмыстарды ақтаймыз. 

Қазақстан мен Өзбекстанның су шаруашылығында ашық саясат қалыптасты.

Тарансшекаралық өзендерді ортақ пайдалану мен тең бөлу қағидасы жұмыс істейді. Су дипломатиясы жолға қойылып, Орталық Азия мемлекеттері арасында өзара түсінік орнады. 

Шавкат Хамраев, Өзбекстанның су шаруашылығы министрі:

- Сушыларымыз арасында өзара тәжірибе алмасу, жаңа технологияны енгізу бойынша үнемі кездесулер өтеді. Бұл өз кезегінде саладағы байланысты тереңдетіп, біріккен жобалар жасауға мүмкіндік береді. Сондай-ақ әріптестерімізбен каналдарды бетондау бойынша да пікір алмастық. Себебі су жерге сіңбей, мейлінше үнемделуі тиіс. 

Арал мәселесі де күн тәртібінен түскен емес. Қазір халықаралық қорлар арқылы аймаққа инвестор тарту жұмыстары жүріп жатыр. Ал Қазақстан  аумағындағы солтүстік Арал соңғы үш жылдағы көрсеткіштен 111 шаршы шақырымға артық сумен толыққан. Оң өзгерістер тұздылық деңгейін төмендетіп, экожүйеге 22 балық түрінің қайта оралуына мүмкіндік берді.

Дулат Нуркин