Қазақстан қай елдерден туристерді тартуға екпін қойып отыр

– Халықаралық маркетингті күшейту арқылы Kazakh Tourism-нің жұмысына басқаша қарау бойынша тапсырма берілді. Осы саладағы туризмнің тартымдылығын күшейту үшін жарнаманы көбейту керек. Ең алдымен, «мақсатты турист» деген ұғымға екпін қойдық. Мәселен, біз елге шақыратын туристер бар, яғни 10 млн шетелдік келсе, оның ішінде турист ретінде қомақты пайда әкелетіндері бөлек. Сондықтан ұйымдастырылған туризмге барлық маркетингті бейімдедік. Қытайдың ірі қалаларына тікелей әуе рейстері ашылып жатыр. Осы орайда сол нарықтарға барып, сол жақтан келетін адамдардың санын көбейтуге жұмыс істедік, - деді Д. Сержанұлы.

Бұл тұрғыда ол нақты бір нарықтарға арналған және туристік өнімдерге бағытталған маркетингке көбірек көңіл бөлінгенін айтты.

– Жалпы, туризмнің маркетингі қиын емес. Оны іске асыру үшін әуе компанияларымен, туристік ұйымдармен серіктестік орната бастадық. Мысалы, Гуанчжоудан Air Astana жаңа рейс ашып жатқанын естісек, әуе компаниясымен сол жерге барып, келіссөздер жүргіземіз. Қытайдағы туристік оператордың өкілдерін Қазақстанға алып келіп, үлкен таныстырылым жасаймыз... Ең басты мақсат – шетелге Қазақстанның туристік әлеуетін таныстыру. Бар күш-жігерді осы бағытқа бұрдық. Өйткені, Қытай, Үндістан, Оңтүстік Корея, Малайзия, Жапония, Араб елдері мен Еуропа мемлекеттерімен жеке-жеке жұмыс істеуіміз керек, - деді Даниел Сержанұлы.

Еске салсақ, былтыр маусым айында Президент Қасым-Жомарт Тоқаевтың төрағалығымен туризмді дамыту жөніндегі кеңес өтті. 

Мемлекет басшысы еліміздің географиялық тұрғыдан оңтайлы орналасқанына, алуан түрлі табиғатымыз, бай әрі бірегей тарихи-мәдени мұрамыз бар екеніне қарамастан, туризм саласындағы әлеуеттің толық пайдаланылмай отырғанын сынға алды.