Қазақстанда шәкіртақы 500 мыңға дейін өседі Саясат Нұрбек жоспарларды жариялады

Ғылым және жоғары білім министрінің міндетін атқарушы Саясат Нұрбек Қазақстанда студенттердің, магистранттар мен докторанттардың шәкіртақысын көтеру жоспары туралы айтты. Сөз 100-ден 500 мың теңгеге дейінгі сомалар туралы болып отыр, деп хабарлайды Tengri Edu тілшісі.

Шәкіртақы қалай өседі?

Саясат Нұрбек Tengri Edu тілшісіне берген сұхбатында кейінгі бес жылда Қазақстан жоғары оқу орындарындағы шәкіртақы мөлшері екі есе өскенін айтты. Енді министрлік бұл өсімді жалғастыруды көздеп отыр.

Бұл алдағы бес жылда жоғары оқу орындарындағы шәкіртақы жыл сайын көтеріліп, нәтижесінде тағы екі есеге артады дегенді білдіреді.

"Индекстеуді тоқтатпаймыз, келесі бес жылда да осылайша 15–20 пайыз аралығында қосып, тағы 100 пайызға көтеру үшін арттырып отыруды жоспарлап отырмыз", – деп түсіндірді ол.

Мәселен, министрдің міндетін атқарушының есебі бойынша, докторанттардың шәкіртақысы 500 мың теңгеден асады.

"Мысалы, қазір докторанттардың ай сайынғы шәкіртақысы – 262 мың теңге. Енді біз 2026 жылдан 2030 жылға дейін тағы бір цикл бойынша жүріп, оны тағы 100 пайызға арттырғымыз келеді. Бес жыл ішінде өсірсек, 2030 жылға қарай ол 500 мыңнан асады", – деді Саясат Нұрбек.

5 жылдан кейін шәкіртақы қандай болуы мүмкін?

Үкімет қаулысына сәйкес, қазіргі уақытта мемлекеттік шәкіртақы мөлшері келесідей:

бакалавриат студенттеріне – 52 372 теңге; педагогикалық мамандықтар бойынша білім алушыларға – 84 000 теңге; магистранттарға – 117 098 теңге; докторанттарға – 262 500 теңге.

Егер Ғылым министрлігінің жоспары жүзеге асып, шәкіртақы жыл сайын индекстелетін болса, бес жылдан кейін олар шамамен мынадай болады:

бакалавриат – 105 000 теңге; педагогикалық мамандықтар – 168 000 теңге; магистратура – 234 000 теңге; докторантура – 525 000 теңге.

Бұл ретте Саясат Нұрбектің айтуы бойынша, өсім біртіндеп – шамамен 15-20 пайызға жүргізілетінін түсіну маңызды. Яғни, бұл қазір бекітілген төлем мөлшері емес, министрліктің жоспары.

Еске сала кетейік, Қазақстанда шәкіртақыны көтерудің бес жылдық бағдарламасы аяқталды. Алайда, 2026 жылдың наурызында Үкіметте өткен брифингте Ғылым және жоғары білім министрі Саясат Нұрбек бұл бағдарламаны қайта бастау жоспарланып отырғанын айтқан болатын.

Google News арқылы жаңалықтарымызды қадағалаңыз

Жазылу