Қазақстанда түсірілген шоуды Францияда 1,5 миллионға жуық көрермен тамашалады

Қазақстанда түсірілген саяхат-шоуды Францияда бір жарым миллионға жуық көрермен тамашалады.

Әңгіме танымал «Бейжің-экспресс» француз бағдарламасы жайлы. Жоба екі ай бойы M6 телеарнасында әр жұма сайын кешкі прайм-таймда көрсетілді. Еліміз қатысушыларды немен таңқалдырды? 

Керемет адамдар мен қонақжайлық - Pékin Express шоуының жеңімпаздары Қазақстан жайлы ойымен бөлісті. 

Танымал шоудың атақты жүргізушісі Стефан Ротенберг бағдарламаның 21-маусымында көрерменді қыста Қазақстанның таулы аймағында қарсы алды. «Бейжің экспресс» Франция, Бельгия мен Люксембургте 20 жылдай бойы үзбей көрсетілетін бағдарлама. Түсірілімдер былтыр ақпан мен наурыз айларында өтіп, Шымбұлақ, Шарын шатқалы, Ақсу-Жабағылы қорығы, Алматы мен Астананы қамтыды. Жеңімпаздар бельгиялық кәсіпкер Натали мен оның қызы акушер Шарлоттың айтуынша, кастинг кезінде продюсерлер осы маусым түсірілмдердің ең қиынының бірі болатынын ескерткен. Олар тіпті сапардың Қазақстанда өтетінін тек ұшар алдында ғана білген.

Шарлот Игуэт, Pekin Express жобасының жеңімпазы:

- Шынымды айтсам, бұл жобаға дейін Қазақстан туралы, оның табиғаты, климаты мен бай мәдениеті жайлы білмедім. Бірақ бәрі керемет болды. Әсіресе адамдардың қонақжайлығы пен ашықтығы таңқалдырды. Қонаққа барған сайын үйде туыстар, балалар жиналып, үлкен дастарқан жайылатын. Оған қоса түсірілім Рамазан айында өтті. Бұл ерекше, жылы сәттер болды.

«Бейжің экспресс» қатысушыларды тек физикалық тұрғыдан ғана емес, әлеуметтік дағдылары жағынан да сынайды. Сегіз жұп экстремалды жағдайда түрлі тапсырмаларды орындап, күніне бар болғаны бір еуромен тамақ пен түнейтін жер табуы тиіс болды. Қазақстанда оларды 10 мың шақырымға созылған саяхат, алты метрлік кілемдерді тасу, мұз ойығына түсу және басқа да сынақтар күтіп тұрды. Бірақ Наталидің айтуынша, осындай қиын сынақтарда саяхатшыларға қазақтардың қонақжайлығы көп көмегін тигізген.

Натали Игуэт, Pekin Express шоуының жеңімпазы:

- Маған Қазақстан өте қатты ұнады. Әсіресе адамдардың мейірімділігі. Бізді барлық жерде аса жомарттықпен қарсы алып, қолдан келгеннің бәрімен көмектесуге тырысты. Қонақжайлықтың шегі жоқ. Таулы және далалық пейзаждар да керемет. Меніңше, бұл ел туралы аз айтылады. Қазақстанды әлдеқайда көбірек таныту керек.

M6 телеарнасында әр жұма сайын прайм-таймда көрсетілген бағдарламаны бір жарым миллионға жуық көрермен тамашалаған. Шарлоттың айтуынша, «Қазақстан маусымы» жобаның ең экстремалды әрі ең есте қаларлық кезеңдерінің біріне айналған. Шоудың жанкүйері болған ол бұл сапарға анасын өзі үгіттеген.

Шарлот, Pekin Express шоуының жеңімпазы:

- Менің ойымша, бұл жоба Қазақстанды кең аудиторияға көрсетудің тамаша тәсілі болды. Бұл адамдарды саяхаттауға ынталандыратын, тіпті экран арқылы болса да елді танып, мәдениеті мен өмір салтын сезінуге мүмкіндік беретін керемет жоба. Мен саяхаттауды жақсы көремін және жаңа елмен танысу ескі көзқарастарды бұзып, сені байытатынын жақсы білемін.

Шарлот Қазақстанға қайта оралуды жоспарлап отыр, бұл жолы достарымен бірге. Демек, «Мұзды жол» деп аталған бұл маусым Франция мен Қазақстан арасындағы тағы бір мәдени көпірге айналды.

Айдана Айтбекқызы, Руслан Өміржан