Қазақстандағы энергетикалық және коммуналдық сектор жаңартылады

Үкімет «Энергетикалық және коммуналдық секторларды жаңғырту» ұлттық жобасын іске асырады.

Алдағы 5 жылда 200 нысан жаңғыртылады. 86 мың шақырым желі жаңарады.

Кейінгі үш жылда энергетикалық кәсіпорындарды күрделі жөндеу жұмыстарына 900 млрд теңгеден астам жеке инвестиция тартылды. Бұл орайда Мемлекет басшысының қарқынды бәсеңдетпеу керек деген тапсырмасы бар.

Тозығы жеткен ЖЭО үлесі азайды

Ал электр стансаларын жөндеуге салынған капиталдық инвестициялар 20%-ға артты. "Тарифті инвестицияға айырбастау" бағдарламасы тозған жылу электр орталықтарының санын азайтуға мүмкіндік берді. Бүгінде Кентау, Риддер және Екібастұз стансаларын қоса алғанда 9 энергетикалық нысан қызыл аймақтан шығарылды. Бірқатар жаңа қуат көзі іске қосылды. Атап айтқанда, Текелі энергетикалық кешенінде газ турбиналық қондырғылар пайдалануға берілді. Топар мемлекеттік аймақтық электр стансасында 130 мегаватт қуаттылығы бар жаңа турбоагрегат қолданысқа енді. Сөйтіп, энергия өндірісі рекордтық деңгейге дейін артты.+++

Ерлан Аққенженов, ҚР Энергетика министрі:

- Энергетикалық жүйе сұраныстан озып жұмыс істеп, рекордтық 118 миллиард киловатт-сағат электр энергиясын берді. Жыл соңына қарай көрсеткіш 122 млрд-тан асады. Келесі жылдан бастап өңірлерде жүйелі жұмыс басталады: жылумен қамтамасыз ету схемаларын қайта қарау бойынша практикалық жұмыстар жүргізілетін болады. Пилоттық жобалар Жамбыл облысы мен Шымкент қаласында белгіленді.

Энергетика және коммуналдық секторды жаңғырту жөніндегі ұлттық жоба аясында 2029 жылға дейін электр желілерінің тозуын 74%-дан 45%-ға дейін төмендету көзделген.

«Таза көмір» технологиясына көшу міндет

Қаңтар-қазан аралығында еліміз электр қуатын 25 пайызға көбірек импорттады. Әйтсе де, мемлекет басшысы өз мүмкіндігімізді дұрыс пайдалану қажет деп, сыртқы елдерден электр энергиясын алуды тоқтатуды тапсырды. Ол мұны ұлттық қауіпсіздік мәселесіне балайды. Елде жыл сайын 110 млн тоннадан аса көмір өндіріледі. Енді "таза көмір" технологиясына көшуді жеделдету керек. Кәсіпорындар да энергия үнемдеуге міндетті. Бұған дейін мәжіліс депутаттары қуатты асыра пайдаланған ұжымдарға айыппұл көлемін 50 пайызға дейін, қайталанған жағдайда 100 пайызға дейін арттыруды ұсынған еді. Қазір ол шағын бизнес үшін 3 пайыз, ірі кәсіпорындар үшін артылған шығынның 10 пайызына тең. Депутаттар кәсіпкерлерге жаңа технология енгізгеннен гөрі айыппұл төлей салу жеңіл болып тұрғанын алға тартты. 

Энергетиктерге сұраныс жоғары

Ал 2030 жылға қарай елде 1,5 млн энергетик маман қажет болады. Қазірдің өзінде салада 2 мыңнан аса бос орын бар. Әсіресе электр энергиясы, атом және мұнай-газ бағытында тапшылық қатты байқалады. Сондай-ақ жаңартылатын энергия көздерінің инженері, дата-сарапшылар және сутегі энергетикасы бойынша мамандар дайындау қажет.