Қазақстандық жұлдыздарды есірткіге тексеру ұсынылды

Қазақстанда танымал жұлдыздарды есірткі қолдану белгілеріне тексеру ұсынылды. Мұндай бастаманы Астана мәслихатының депутаты Ләйлә Сұлтанқызы көтерді, - деп хабарлайды Tengri Life.

Қазақстанда танымал жұлдыздарды есірткі қолдану белгілеріне тексеру ұсынылды. Мұндай бастаманы Астана мәслихатының депутаты Ләйлә Сұлтанқызы көтерді, - деп хабарлайды Tengri Life.

Сұлтанқызының айтуынша, мұндай тәжірибе бірқатар зайырлы мемлекеттерде, атап айтқанда Түркияда қолданылады. Оның айтуынша, онда ауқымды тергеу аясында ондаған танымал тұлға есірткі заттарын анықтау үшін медициналық куәландыруға, қан тапсыруға және басқа да талдаулар жасауға жіберілген.

"Соңғы екі апта ішінде ешқандай алдын ала ескертусіз және адамның мәртебесіне, бай немесе танымал екеніне қарамастан, барлығынан жаппай қан талдауы алынып жатыр. Егер тексеру нәтижесінде заңбұзушылықтар анықталса, адам жауапқа тартылады және бұл ақпарат ашық жарияланып, бүкіл елге мәлім болады", - деді ол.

Депутаттың сөзінше, мұндай бастаманың бізде қаншалықты іске асуы мүмкін екенін айту қиын.

"Дегенмен мұндай тұлғалардың жастарға ықпалы зор, сондықтан жұмысты солардан бастау керек деген идея бар. Бұл түптеп келгенде заңның неғұрлым тиімді жұмыс істеуіне септігін тигізеді деп күтіледі", - деді Сұлтанқызы.

Ол танымал тұлғаларды тексеріп, кейін жауапқа тарту "өзгелердің мінез-құлқына әсер етуі" мүмкін екенін айтты.

Оның әріптесі, депутат Азамат Айтхожин бұл бастаманы барлық мүдделі тараптардың қатысуымен тиісті алаңда талқылауды ұсынды.

"Есірткіге және есірткі бизнесіне қарсы күрес басқармасы, бұл ұсынысты сіздердің алаңдарыңызда талқылайық. Прокуратураны, денсаулық сақтау саласының өкілдерін шақырып, қажетті іс-шараларды өткізейік. Бір орында тұрып қалмауымыз керек - есірткіге және есірткі бизнесіне қарсы күрестің барлық мүмкін жолдарын іздеуіміз қажет", - деді ол.

Айта кетсек, бұған дейін Стамбул прокуратурасы 25 наурызда есірткіні жеке қолдану үшін сақтады немесе қолдануға септігін тигізді деген күдікпен 16 адамды ұстауға ордер берілгенін хабарлаған болатын.

Іс бойынша айыпталушылар арасында "Есігімді қақ" (Постучись в мою дверь) сериалының жұлдызы Ханде Эрчел, актрисаның бұрынғы сүйіктісі - миллионер Хакан Сабанджи, сондай-ақ Фикрет Орман, Гюзиде Аксой (Гюзиде Дуран), Керим Сабанджи, Бурак Элмас, Сезгин Кёйсурен, Ферхат Айдын, Лютфие Тугче Озбудак, Корай Серенли, Онур Бюкчю, Исмаил Берхан Перинчекли, Каан Мелларт, Дидем Сойдан, Онур Талай және Мустафа Тари бар.

Жауап алудан кейін күдіктілердің бір бөлігін қамауға алу туралы өтінішпен сотқа жіберген. Нәтижесінде сот Корай Серенлиді, Онур Талайды, Сезгин Кёйсуренді және Мустафа Тариді қамауға алу туралы шешім шығарды. Тағы бірқатар күдіктіге қатысты елден шығуға тыйым салу және үй қамағы түріндегі бұлтартпау шаралары таңдалды. Онур Бююктопчу жауап бергеннен кейін босатылған.

Ал 27 наурызда Сот медицинасы институтында Дидем Сойдан, Онур Талай, Исмаил Берхан Перинчекли, Мустафа Тари, Ферхат Айдын, Корай Серенли және Озан Гюмюштен қан мен шаш үлгілері алынған. Сараптама нәтижелері олардың ағзасында тыйым салынған заттар барын растады.

Сонымен қатар Керим Сабанджи, Гюзиде Дуран Аксой және Онур Бюкчюдің ағзасынан есірткі ізі табылмады. Батуарай Оздемирдің де сараптамасы теріс нәтиже көрсеткен, алайда оның шашынан медициналық антидепрессанттардың белсенді компоненті - сертралин заты анықталған.

Google News арқылы жаңалықтарымызды қадағалаңыз