Қазақстандықтар 78 елге визасыз немесе жеңілдетілген режиммен бара алады

Қазақстан паспорты әлемдегі ең ықпалды төлқұжаттар рейтингінде позициясын жақсартты.
2026 жылға арналған жаңартылған Henley Passport Index мәліметіне сәйкес, Қазақстан 57-орынға көтерілді. Енді қазақстандықтар әлемнің 78 еліне визасыз немесе жеңілдетілген тәртіппен саяхаттай алады.

Henley & Partners компаниясының дерегінше, Қазақстан паспорты соңғы жылдары халықаралық рейтингте тұрақты түрде жоғарылап келеді.

2023 жылы Қазақстан 70-орында болса, 2024 жылы 66-орынға, 2025 жылы 61-орынға көтерілген. Ал 2026 жылғы рейтингте ел 57-сатыға жайғасты. Осылайша, соңғы екі жарым жылда қазақстандық паспорт 13 позицияға жоғарылаған.

Визасыз сапардың екі негізгі форматы бар: толық визасыз режим және шартты визасыз режим.

Толық визасыз режимде шетелге кіру үшін тек паспорт жеткілікті, шекарада кіру мөрі басылады.

Ал шартты визасыз режимде виза немесе рұқсат елге барғаннан кейін рәсімделеді немесе алдын ала күрделі мақұлдауды қажет етпейді. Кей жағдайда мұндай қызмет ақылы болуы мүмкін және қонақүй броні, қайту билеті немесе медициналық сақтандыру сияқты қосымша құжаттар сұралады.

Сондықтан мамандар сапар алдында сыртқы істер органдарының ресми ақпаратын тексеруге кеңес береді.

Қазақстан азаматтары Қытайдың материктік бөлігі мен Хайнань аралына 30 күнге дейін визасыз бара алады.

Сондай-ақ 30 күнге дейін немесе қысқа мерзімге визасыз баруға болатын елдер қатарында:

– Малайзия
– Мальдив аралдары
– Біріккен Араб Әмірліктері
– Бразилия
– Вьетнам
– Катар
– Марокко
– Никарагуа
– Оман
– Сербия
– Филиппин
– Эквадор
– Кук аралдары

Иранға, Гонконг пен Макаоға – 14 күнге дейін, Барбадосқа – 28 күнге дейін, Аргентинаға – 30 күнге дейін визасыз баруға болады.

Тунис қазақстандықтарды 90 күнге дейін визасыз қабылдайды. Ал Өзбекстанға кіру еркін болғанымен, 30 күннен артық қалатындар тіркеуден өтуі тиіс.

Оңтүстік Кореяға 30 күнге дейін визасыз баруға рұқсат етіледі, бірақ алдын ала K-ETA электронды рұқсатын рәсімдеу қажет.

Кейбір елдер қазақстандықтарға ұзақ мерзімге визасыз болуға мүмкіндік береді.

Мәселен:

– Грузия – бір жылға дейін;
– Түркия – 90 күнге дейін;
– Таиланд – 60 күнге дейін (TDAC электронды картасын толтыру қажет);
– Әзербайжан мен Қырғызстан – визасыз, бірақ белгілі мерзімнен кейін тіркеу талап етіледі.

Сонымен қатар Албания, Армения, Беларусь, Доминикан Республикасы, Индонезия, Колумбия, Молдова, Моңғолия, Ресей, Сейшель аралдары және өзге де бірқатар елдер қазақстандықтарға жеңілдетілген режим ұсынады.

Henley Passport Index – әлем елдерінің паспорттарын халықаралық қозғалыс еркіндігі бойынша бағалайтын жаһандық рейтинг.

2026 жылғы индексте 199 елдің паспорты және әлем бойынша 227 бағыт қарастырылған.

Бағалау жүйесі мынадай қағидаға негізделеді:

– визасыз кіруге мүмкіндік болса – 1 ұпай;
– виза елге барған кезде немесе жеңілдетілген түрде рәсімделсе – 1 ұпай;
– алдын ала виза немесе e-Visa алып, мемлекеттік мақұлдау қажет болса – 0 ұпай.

Сарапшылардың пікірінше, паспорт рейтингі азаматтардың халықаралық сапарлардағы еркіндігін көрсететін маңызды көрсеткіштердің бірі саналады.