Қазақстандықтарға 2026 жылға дейін айыппұлсыз Кореядан шығып кетуге ​мүмкіндік жасалды

Қазақстанның Еңбек және халықты әлеуметтік қорғау министрлігі мен Корея Республикасының Әділет министрлігі ерікті түрде қоныс аудару бағдарламасының мерзімін ұзарту жөнінде келісімге келді, деп хабарлайды KAZ.NUR.KZ ведомствоға сілтеме жасап.

Министрліктің мәліметінше, тараптар заңсыз көші-қонды азайту және Кореяда жүрген қазақстандық азаматтардың құқықтарын қорғау бағытында келіссөздер жүргізген. Нәтижесінде Кореяда заңсыз жұмыс істеген қазақстандықтарға айыппұл салынбай және қайта кіруге тыйым енгізілмей, елден өз еркімен шығуға мүмкіндік беретін бағдарлама мерзімі ұзартылған.

Енді бұл мүмкіндікті 2025 жылдың желтоқсан айынан 2026 жылдың ақпанына дейін, ақпан айын қоса алғанда, пайдалану қарастырылған.

Хабарламада көрсетілгендей, бағдарлама қылмыстық құқықбұзушылық жасаған, мәжбүрлеп шығаруға жататын, сондай-ақ 2025 жылғы 1 желтоқсаннан кейін заңсыз мәртебеге түскен шетелдіктерге қолданылмайды.

Бағдарламаға қатысу үшін азаматтар төлқұжат, ерікті кету туралы өтініш және әуе билетін ұсынуы тиіс. Ұшу күніне дейін 3–15 күн аралығында Корея Республикасының иммиграция кеңселеріне алдын ала хабарлау қажет.

Еңбек министрлігі қазақстандықтарды шетелде жұмыс істеу кезінде тек заңды жолды таңдауға шақырды. Бұл заңсыз көші-қон, елден шығарылу, айыппұл, құқықтық шектеулер және еңбек қанауы сияқты тәуекелдердің алдын алатыны атап өтілді.

Бүгін, 16:37