Қазығұртта аурухананың бұрынғы бас дәрігері бюджет қаражатын жымқырды деген күдікпен ұсталды

Түркістан облысында Қазығұрт аудандық орталық ауруханасының бұрынғы бас дәрігері бюджет қаражатын жымқырды деген күдікпен ұсталды.

Тергеу нұсқасына сай, ол аурухананың ақшасына өзіне пәтер сатып алған және медициналық жабдықтарды сатып алу кезінде заңсыз схема ұйымдастырған. Алдын ала мәлімет бойынша бұрынғы бас дәрігер ауруханаға қажетті медициналық жабдықтарды сатып алу үшін бірнеше компаниямен жалған келісім-шарттар жасаған. Ауруханадан мердігер компаниялардың есепшотына ақша түскеннен кейін, күдіктілер қаражатты қолма-қол ақшаға айналдырып, өзара бөліскен. Тергеу барысында сол қаражаттың бір бөлігіне пәтер сатып алынғаны анықталды.Тергеушілердің есептеуінше, заңсыз схема нәтижесінде мемлекетке 115 млн теңге көлемінде залал келтірілген.

Ернар Тайжан, ҚР ҚМА ресми өкілі:

- Қылмыстық жолмен алынған қаржыға күдікті Астанадан екі бөлмелі пәтер сатып алған. Сот санкциясымен мүлікке тыйым салынды. Бұрынғы бас дәрігерге қатысты бұлтартпау шарасы ретінде кепіл қолданылды, ал оның сыбайласы үйқамақта отыр.