Қос палатадан бір палатаға: 23 тамыз Құрылтай сайлауы

Мәжілістің II шақырылымында және Сенаттың I шақырылымында депутат болып сайланған, көптеген жұмыстардың атқарылуы мен түрлі заңдардың қабылдануына бастамашы болған, саяси өмірде көп жылдық тәжірибесі бар Геннадий Шиповскихтың айтуынша, бүгінде Қазақстан ғана емес, күллі әлем өзгеріп жатыр, дүниежүзінде үлкен-үлкен саяси жүйелер өзгеріп жатыр. Сондықтан Құрылтай – жаңа заманның талабы.

«Менің ойымша, қос палатадан бір палаталы жүйеге көшу – заңдарды жан-жақты және жедел әрі сапалы қарауға септігін тигізетіні анық. Сол себепті заман талабына сәйкес болашақта Құрылтай біздің жоғары заң шығарушы мықты органға айналатынына кәміл сенемін», деді Г. Шиповских.

Ауқымды саяси реформаның алғышарты 

III шақырылымда депутат болған ол Құрылтайға кандидат депутаттардың сайлаушыларымен түрлі байланыста болуы қажет екенін атап өтті.

«Мысалға менің сайлаушыларыммен байланысым түрлі форматта өтті. Облыстық орталықтар мен қалалар ғана емес, шалғай-шалғай елді мекендердің де тұрғындарымен кездесіп жүрдім, жеке қабылдаулар да өткіздім. Instagram, Facebook, TikTok арқылы тікелей эфирлерге шықтым. TikTok-та менде 77 000-нан астам оқырманым бар, сол оқырмандарымның түрлі сұрақтарына бейнеүндеу арқылы жауап қайтарып жүрген кездерім болды. Сондықтан менің саяси тұлға болып қалыптасуыма әлеуметтік желі де креативтік тұрғыдан өзіндік серпін берді нақты айта аламын.

Құрылтайға кандидат депутаттар сайлаушыларымен қарым-қатынас тұрғысында жаңа заманның талабы ретінде әлеуметтік желіні пайдаланса, нұр үстіне нұр», деді Г. Шиповских.

Еске салайық, әуел баста Парламент қабырғаларында 150-ден астам депутат болды. Одан кейін конституциялық реформадан кейін олардың саны 148-ге азайды. Енді Құрылтайда 145 депутат болатыны мәлім. 

Г. Шиповскихтің пікірінше, кез келген елде бірінші кезекте сайлаудың электораттық санына қарайды, яғни халық санына байланысты, сол себепті 145 депутат көп те емес, аз да емес.

«Қателеспесем, көршілес Қырғызстанда 90 депутат, халқы 7-8 миллион. Енді есептеп көріңіз. Біздің елімізде халық саны 20 миллионнан астам, оның ішінде сайлауға қатыса алатын адамдар 18 жастан асу керек, соған сәйкес 145 депутат көп те емес, аз да емес, тура сәйкесіп тұр», деді ол.

Қазақстанның саяси партиялары Құрылтай сайлауына толық дайын екенін мәлімдеді

Сонымен қоса, Геннадий Шиповских өз сөзінде «Amanat» партиясының өте көп жұмыс атқарғанын атап, оның «Әділет» партиясына қосылып, бұл сайлаудан бас тартуы – оңды шешім болғанын тілге тиек етті.

«Мен өзім «Amanat» фракциясының мүшесі болдым, партия «Жер аманаты», «Кедергісіз келешек» т.б. мықты жобаларды іске асырды. Мысалға «Жер аманаты» жобасы шеңберінде 1 милллион гектардан астам жер мемлекеттің меншігіне қайтарылды. Еске алатын болсақ, «Amanat» партиясы осы 4 жылдың ішінде көптеген жан-жақты жобаларды жақсы жүзеге асырды.

Президенттік бағытты ұстанатын «Әділет» партиясы құрылды. «Amanat»  фракциясының да көзқарасы дәл сол бағытта. Мемлекет басшысы өзінің бір сөзінде: «Еліміздегі көптеген мықты-мықты саяси күштер жалпы біріккені абзал», деп айтқаны мәлім. Осы орайда «Amanat»  фракциясы «Әділетпен» бірлесіп, бір партияға айналды. «Amanat»  партиясының мүшесі болған мықты кадрлар бар, мықты жобалар да бар. Бұл 2 партияның бірігуі жай ғана саяси додаға бірге қатысу емес, бұл бірігудегі ең басты мақсат – халықтың мүддесі. «Әділет» партиясының көптеген ұлы жетістіктерге жететініне толық сенімдімін», деді ол.

Жаңа есімдер мен танымал тұлғалар: «Әділет» партиясының сайлауалды тізіміне кімдер енді?

Қоғамда «заңдар неғұрлым жедел қабылданса, соғұрлым сапасы төмен болуы мүмкін» деген пікір айтылып жатыр, байқауымызша, көптеген адамдар солай ойлап жүр. Г. Шиповских бұндай пікірмен келіспейтінін айтты.

«Мұндай көзқараспен келіспеймін, өйткені бұрын Парламентте 2 сатылық сүзгі (Мәжілісте 2 оқылымнан өтіп, Сенатта да 2 оқылымнан өтетін) болса, енді Құрылтайда 3 сатылық сүзгі болады, бұл – заңдардың сапалы қаралуы тұрғысында өте жақсы тетік», деді ол.

Депутат аталған тетіктің ешқандай кері әсер етпейтінін, бір палаталы құрылымда заңдар әлдеқайда сапалы қабылданатынына толық сенетінін атап өтті.

«Ең бастысы, Құрылтайда мықты-мықты маман депутаттар болса, заңдардың сапалы қабылдануына ешқандай кедергі болмайды», деп түйіндеді Геннадий Шиповских.

Сайлауға қатысу – азаматтық парыз: Құрылтай – халықтың жаңа таңдауы