Қостанай облысында аудиттен кейін 51 млрд теңге қаржылық заңбұзушылық анықталды

Қостанай облысында жүргізілген мемлекеттік аудит нәтижесінде 51 млрд теңге көлемінде қаржылық заңбұзушылық және 50 млрд теңге тиімсіз жоспарланған немесе пайдаланылған бюджет қаражаты анықталды. Бұл туралы Жоғары аудиторлық палатаның баспасөз қызметі мәлімдеді, деп хабарлайды Arasha.kz.

Аудиторлардың мәліметінше, өңірдің жалпы өңірлік өнімі өсіп жатқанымен, әлеуметтік-экономикалық көрсеткіштердің жақсаруы тұрақсыз. Атқарушы органдардың жұмысында жоспарлау мен басқаруда жүйелі кемшіліктер бар.

2020–2024 жылдары жергілікті бюджет кірістері 75%-ға артқан. Алайда меншікті кірістердің үлесі небәрі 7%-ға өсіп, 29%-дан 36,1%-ға жеткен. Сонымен қатар бюджетте 19 млрд теңге пайдаланылмаған қалдық бола тұра, 30 млрд теңге қарыз тартылған.

Өңірге тікелей шетелдік инвестициялар баяу тартылуда. 2025 жылы іске қосылуы тиіс құны 188 млрд теңгелік 8 инвестициялық жобаның 6-уы әлі пайдалануға берілмеген. Аймақты дамыту бағдарламасын орындауда да кемшіліктер анықталған: 2022–2024 жылдары жоспардан жыл сайын 12-ден 164-ке дейін инвестициялық жоба алынып тасталған.

Инфрақұрылымдық жобаларды жүзеге асыру кезінде жобалық-сметалық құжаттардың сапасы төмен болғандықтан кейбір нысандар аяқталмаған немесе құрылыс барысында қайта түзетуді қажет еткен.

Мемлекеттік қолдау алған 352 кәсіпкердің 179-ы қызметін тоқтатқан, тағы 168-і жаңа жұмыс орындарын ашу міндеттемесін орындамаған. Бұл бөлінген қаражаттың тиімділігі жеткілікті бақыланбағанын көрсетеді.

Жол құрылысы сапасын бақылау да әлсіз. Тексерілген 12 жол учаскесінде асфальттың шөгуі мен бұзылуы сияқты ақаулар табылған.

Ауыл шаруашылығы өңірдің негізгі саласы болғанымен, соңғы жылдары өнім көлемі азайып, мал саны қысқарған, жабылған шаруашылықтар көбейген.

Мемлекеттік сатып алу саласында 12 млрд теңге көлемінде заңбұзушылық анықталған. Сондай-ақ дәрігерлік амбулаториялар құрылысы жобаларында медициналық жабдықтардың бағасы шамамен 200 млн теңгеге артық көрсетілген. Кейбір жабдықтар жобадағы бағадан 18–46 есе арзан сатып алынған.

Жалпы 52 дерек бойынша материалдар әкімшілік іс қозғау үшін құзырлы органдарға жіберілді.