Қостанай облысында қаладағы жылу желісінің жартысы тозып тұр

Арқалықта биыл 10 шақырым жылу құбырын ауыстыру жоспарланған. Алайда қажетті қаржы толық бөлінбегендіктен, жоспар орындалмады. 

Жалпы соңғы үш жылда қаладағы 35 шақырымға жуық желінің жартысы ғана жаңғыртылды. Қалған 48 проценті тозып тұр. Шағын шаһарадағы жылу құбырларының біразы 1990 жылдары жүргізілген. 

Арқалық жылу энергетикалық орталығы үш жыл бұрын мазуттан көмірге көшті. Сол кезде жабықтарын жаңғырту жұмыстары жүргізілді. Қазір төрт қазандық жұмыс істеп тұр, бесіншісі резервте. «Әзірге жылу беру желісінде ешқандай ақау байқалған жоқ», – дейді мамандар.   

Жасұлан Әбдірахманов, Қалалық жылу энергетикалық орталығының директоры:

- Біздің жылдық көмір маусымы 48 мың тоннаны құрайды. Қазіргі таңда 9 мың 255 тонна көмір бар. Ол 36 күндік қор. Оның сыртында мазутымыз 2 мың 624 тонна. Ол 21 күндік қор. Көмірлер қазір уақытында дер кезінде бекітілген кестеге байланысты келіп тұр.

Қалада орталықтандырылған жылу желісі 350-ден астам тұрғын үйді қамтиды. Құбырдың жалпы ұзындығы 35 шақырымға жуық. Бұған дейін соның 90 пайызы әбден тозған еді. Үш жыл бұрын жылу желісін жаңғырту жұмысы қолға алынып, осы аралықта ескі құбырдың жартысы жаңартылды. 

Ұлмекен Құсайынова, қала тұрғыны:

- Трубаларды өзгертті ғой, сол кезде байқалды. Бұрыңғыдан жылы болды. Бүкіл қала бойынша тұрғындар да тас жолды ауыстырғаннан кейін жақсы болды деп айтады.

Биыл жаңғырту жұмыстарының үшінші кезеңінде 10 мың шақырымға жуық жылу желісін жаңарту жоспарланған болатын. Оған шамамен 5 миллиард теңге бөлінуге тиісті еді. Алайда қаржыландыру шектеліп, қалған жұмыс келесі жылға қалды. 

Өміржан Әбдібеков, Қалалық құрылыс, сәулет және қала құрылысы бөлімі басшысының орынбасары:

- Үшінші кезектегі ақша жылу жүйесіне берілді. Алайда жылу жүйесіне 200 миллионнан астам ғана қаржы берілгеннен кейін 400 метрді осы жылы жасап отырмыз. Келесі жылы осы ақшаны толығымен беретін болса, жобаны аяқтаймыз.

Сонымен қатар биыл қаланың жеті шақырым кәріз желісі жаңартылды. Алдағы жылы тағы 30 шақырым құбыр ауыстырылады. «Оған 12 миллиард теңгеден астам қаржы қажет», - дейді жауаптылар.

 Авторлары: Мағауия Қалиев, Сергей Трахтенберг