Қостанайда көпқабатты үйде болған өрттен бес адам құтқарылды

Қостанайда бес қабатты тұрғын үйде шыққан өрттен бес адам, оның ішінде бір бала құтқарылды. Өрт аз уақыт ішінде толық сөндірілді, деп хабарлайды Egemen.kz.

112 қызметіне көпқабатты үйдің төртінші қабатындағы пәтерден өрт шыққаны туралы ақпарат түскен соң, оқиға орнына ТЖМ өрт сөндірушілері мен медицианлық жедел жәрдем бригадалары дереу жеткен.

Қызыл жалын пәтер ішін тез шарпығандықтан, құтқарушылар бірінші кезекте адамдарды эвакуациялауға кірісті.

Құтқарушылар баспалдақпен төрт адамды, соның ішінде бір баланы қауіпсіз жерге шығарды.

Тағы бір ер адамды өрт сөндіру автосатысының көмегімен терезе арқылы эвакуациялады.

Барлық зардап шеккен адам жедел жәрдем дәрігерлеріне тапсырылды.

ТЖМ өртті аз уақыттың ішінде толық сөндіргенін хабарлады. Қазір мамандар өрттің нақты шығу себебін анықтап жатыр.

Мамандар тұрғындарға электр құрылғыларын пайдаланғанда, жылыту құрылғыларын қосқанда, үйде жалғыз балаларды қалдырғанда өрт қауіпсіздігін мұқият сақтауды ескертеді.

«Осындай қарапайым талаптарды орындамау қайғылы жағдайларға әкелуі мүмкін», – дейді олар.