Құдайдан кешірім сұрағым келді : Сәрсемәлиев сотта күтпеген мәлімдеме жасады

Фото: Ашық дереккөз

Іс Атырау облысының қылмыстық істер жөніндегі мамандандырылған ауданаралық сотында қаралып жатыр. 

Айыпталушы сотта қылмыс жасағаннан кейін елден кету туралы шешім қабылдағанын айтты.

«Түркияға қашып кетуді ұйғардым. Жасырынып жүруді мақсат етпедім. Тек Құдайдан кешірім сұрағым келді. Не істегенімді түсіндім. 10 қарашадан кейін Түркия арқылы Меккеге бардым. Ол жақта шамамен он күндей болдым. Тіпті сол жерде өз-өзіме қол жұмсау туралы ой келді. Өйткені мені Құдайдан басқа ешкім түсінбейді деп ойладым. Бірақ олар да кінәлі деп есептеймін, мен оларды себепсіз өлтірген жоқпын», деді айыпталушы.

Тергеу нұсқасына сәйкес, қайғылы оқиға 2025 жылдың соңында Жангелдин ауылында болған. Сол кезде отбасының төрт мүшесі – ата-анасы, ұлы мен қызы із-түзсіз жоғалып кеткен.

Айыптау тарапының мәліметінше, күдікті өзіне күмән туғызбау үшін туыстары емделуге кетіп қалған деген ақпарат таратқан. Сонымен қатар марқұм болған 32 жастағы балдызы Наурыздың атынан туыстарымен хабарласып, мессенджерлер арқылы хат жазып отырған.

2026 жылғы 6 қаңтарда егде жастағы ерлі-зайыптылардың мәйіттері өз үйлерінің ауласындағы сарайдан табылған. Осыдан кейін күдікті халықаралық іздеуге жарияланған.

Ақпан айының соңында Сәрсемәлиев жұбайымен бірге Индонезиядағы Бали аралында ұсталып, кейін Қазақстанға экстрадицияланды.

Қайта жүргізілген тергеу барысында ол кінәсін мойындап, әйелінің екі бауырының мәйіттері жасырылған орынды көрсеткен.

Қазіргі уақытта іс бойынша сот процесі жалғасып жатыр.