Құтқарушы өзінің емес, өзгенің амандығын ойлайды Шынболат Берікұлы

Қазан айының 19-ы – Құтқарушылар күні. Еліміздегі ең жауапты әрі қаһарман мамандық иелерінің мерекесі. Бұл күн – өз өмірін қатерге тігіп, өзгенің өмірін сақтап қалу жолында аянбай еңбек ететін ер жүрек жандарға құрмет көрсету күні.

Қазақстан тәуелсіздік алғанға дейін елімізде кәсіби апаттық-құтқару қызметі болмаған еді. Сол жылдары адамдарды және қоғамды апаттық жағдайлардан құтқару ісімен көбіне қоғамдық ұйымдар мен ерікті құтқару бекеттері айналысқан. Ал бұл міндеттің бір бөлігі милиция қызметкерлеріне жүктелді.

Мемлекеттік деңгейде маңызды бұл қызмет жүйесін қалыптастыру мақсатында 1995 жылы еліміздің төтенше жағдайлар жөніндегі мемлекеттік комитеті құрылды. Осы тарихи шешімнің нәтижесінде 19 қазан – Құтқарушылар күні болып белгіленді.

Төтенше жағдайлар саласы — үлкен жауапкершілікті, темірдей тәртіп пен рухани беріктікті талап ететін сала. Бұл қызметтің өкілдері кез келген тосын жағдайдың алдын алып, зардабын жоюға бар күшін салады. Апатқа ұшыраған адамдарды құтқарып, алғашқы медициналық көмек көрсетеді. Сондықтан да құтқарушылар заманауи құрал-жабдықтармен жарақтандырылып, үнемі кәсіби, медициналық және психологиялық тұрғыда дайындықтан өтіп отырады.

Осындай ерлік пен табандылықтың жарқын үлгісін Жамбыл облысы Төтенше жағдайлар департаментінің Азаматтық қорғау подполковнигі Шынболат Берікұлы Әзімбаев көрсетіп келеді.

Ол 2007 жылы Көкшетау техникалық институтын тәмамдап, содан бері өрт сөндіру саласында табан аудармай еңбек етіп келеді. Қазіргі таңда Жамбыл облыстық департаментінде жедел кезекші қызметін атқарады.

«Өрт сөндіру мамандығын таңдауыма әкем себеп болды. Ол да өмір бойы осы салада еңбек етіп, зейнетке шыққан. Мен әкемнің жолын жалғап, осы қызметті таңдадым. Тіпті жұбайым да бұл саладан алыс емес — ол 112 нөмірінде диспетчер болып істейді», дейді құтқарушы.

Бұл мамандықтың ауыртпалығы аз емес. Құтқарушы күн сайын қауіпті ортаға кіріп, адам өмірін арашалап қалады. Дегенмен, Шынболат Берікұлы өз таңдауы үшін еш өкінбейді.

«Кез келген төтенше жағдайда өрт сөндіруші ең алдымен өз өмірін емес, адамдардың амандығын, өрттің таралу қаупін ойлайды. Нағыз өрт сөндіруші батыл, қызметіне адал және қорқынышын жеңе білетін адам болуы керек», деп ойын түйіндеді ол.

2021 жылы Жамбыл облысындағы инженерлік оқ-дәрілер қоймасында болған жарылыс кезінде ол ауыр жарақат алған екі қызметкерді оттың арасынан аман алып шыққан. Сол оқиға кезінде өзі де жарақат алғанымен, қызметінен бас тартпады. Ал соңғы оқиғада бес қабатты тұрғын үйден шыққан өрт кезінде үш баланы құтқарып, олардың өмірін сақтап қалды.

Көрсеткен ерлігі үшін ол Мемлекет басшысының қолынан Сағадат Нұрмағамбетов атындағы I дәрежелі «Айбын» орденімен марапатталды.

«Бүгінгі марапат өте керемет өтті. Президент Қасым-Жомарт Кемелұлының қолынан марапат алғаныма, өте қуаныштымын. Бұған дейін мұндай марапат алған емеспін. Президентке, министрлікке және ТЖД басшылық құрамына біздің еңбегімізді бағалағаны үшін алғыс айтамын», дейді Шынболат Берікұлы.

Құтқарушылардың қызметі — көзге көрінбейтін, бірақ ел өмірінің қауіпсіздігін қамтамасыз ететін маңызды тірек. Олар күннің ыстығы мен суығына, жел мен түтінге қарамай, «тілсіз жаумен» күресіп, әр адамның өмірі үшін арпалысып келеді.

Сондықтан Құтқарушылар күні – бұл жай ғана кәсіби мереке емес, ел амандығы үшін аянбай еңбек ететін, ерлік пен адамгершіліктің символына айналған жандардың мерекесі.