Алмас Қалиев: Құтқарушы болу өзгенің өмірі үшін өз басыңды қатерге тігу

«Ерлігі үшін» медалінің иегері, өрт сөндіруші Алмас Қалиевтің есімі павлодарлықтарға жақсы таныс. Ол отқа оранған үйден балаларды алып шығып, өз басын қатерге тікті. Құтқару қызметінде 14 жылдан бері еңбек етіп жүр.

«Құтқарушы болу — өзгенің өмірі үшін өз басыңды қатерге тігу», - дейді Алмас Қалиев. Ол өрт сөндіруші болуды бала кезінен армандаған. Қазір азаматтық қорғау саласының білікті маманы.

Алмас Қалиев, ТЖД Өрт сөндіру қызметі жедел кезекшісінің көмекшісі:

- Мектеп жасында өрт сөндіруші болғым келді, армандайтынмын. Өйткені менің үйімнің қасында 14-ші өрт сөндіру бөлімі бар Екібастұз қаласында. Балалық шағымызда бізді экскурсияға апарып, өрт сөндіру бөлімімен таныстыратын.

Алмас жұмыс барысында талай рет қауіптен өтті. 2024 жылдың қаңтарында болған оқиға есінде қалыпты. Павлодардағы пәтерлердің бірінде өрт шығып, 13 адамды, соның ішінде 4 баланы қауіпсіз жерге шығарған. Алайда 8-ші қабаттағы балконда кішкентай қыз қалып қойған. Жалын мен қою түтінге қарамастан, Алмас әріптестерімен бірге ішке кіріп, баланы құтқарып қалды. Өжет өрт сөндіруші «Ерлігі үшін» медалімен марапатталды.

Алмас Қалиев, ТЖД Өрт сөндіру қызметі жедел кезекшісінің көмекшісі:

- Бұл марапат мен үшін ғана емес, барша әріптестерімнің еңбегін ескеріп, көрсетілген құрмет деп білемін. Осындай сәттерден кейін қанаттанып, жұмысыңа құштарлығың тіпті арта түседі. Себебі біреуді құтқарып, өмірін сақтап қалғаныңды сезіну ерекше әсерге бөлейді.

«Ол  табиғатынан салмақты,  сабырлы», - дейді әріптестері. Қиын сәтте көмек беретін адал дос. Өзінен кішілерге білгенін үйретіп, жол көрсетіп жүретін нағыз өз ісінің маманы. Ұжымдастары Алмасты осы қасиеттері үшін ерекше сыйлайды.

Абзал Ақанов, ТЖД Өрт сөндіру қызметі жедел кезекшісінің орынбасары:

- Ол өте үлгілі қызметкер. Кез келген тапсырманы сеніп тапсыруға болады. Байсалды, жұмысына ұқыпты жан. Талай құтқару операцияларында бірге болдық. Нағыз кәсіби маман, арқа сүйеуге болатын дос.

Ал Алмас "ерлік жасадым" деп бір сәтке масаттанған емес. Ол өз  жұмысын атқарып жүргенін айтады. Өрт сөндіруші үшін ең маңыздысы – кез келген төтенше жағдайда адамдарды аман алып қалу.  

Авторлары: Руслан Нұрланұлы, Валентина Леонова, Дәулет Қошқарбаев, Марат ИгІлІков