Құжатсыз 200 млрд теңге: Қазақстанда маркетплейс сатушыларын бұғаттауды ұсынды

Қазақстанда тауарлардың шығу тегін растайтын құжаттары жоқ, маркетплейстер арқылы 200 млрд теңгеден астам сомаға жасалған сатылымдар анықталды.

Бұл деректер Салық кодексіне ұсынылып отырған түзетулердің негіздемесінде келтірілген.

Жарияланған мәліметтерге сәйкес, қаралған платформалар арқылы сатылған тауарлардың жалпы көлемі 2 трлн теңгеден асқан.

Ұлттық экономика министрлігі Салық кодексін интернет-ресурстар мен сауда алаңдарындағы сатылымдарды тоқтата тұру туралы баппен толықтыруды ұсынып отыр. Бастама негіздемесінде мұндай механизм сатушының аккаунтын бұғаттау ретінде сипатталған.

Заң жобасының мәтініне сәйкес, бұған салықтық бұзушылықтарды жою немесе камералдық бақылау барысында анықталған сәйкессіздіктер бойынша жіберілген хабарламаны белгіленген мерзімде орындамау негіз болады.

Сатуды тоқтата тұру туралы шешімді салық органы хабарламаны орындау мерзімі аяқталғаннан кейін үш жұмыс күні ішінде қабылдауы тиіс. Содан кейін шешім сатуды шектеу үшін сауда алаңына жіберіледі.

Сауда-саттықты шектеуге себеп болған жағдайлар жойылғаннан кейін оны қайта бастауға болады. Жобаға сәйкес, салық органы өз шешімінің күшін жойып, одан кейін сауда алаңы сатылымдарды қайта қалпына келтіреді.

Құжат 2026 жылғы 25 қыркүйекке дейін қоғамдық талқылауда болады. Түзетулер қабылданған жағдайда жаңа механизмді 2027 жылғы 1 қаңтардан бастап енгізу ұсынылып отыр.

Кеше, 15:02