Қырғызстан Конституциялық соты өлім жазасын қайтаруға тыйым салды

Өлім жазасын енгізуді көздейтін түзету республиканың президенті ұсынғандай референдумға шығарылмайтын болды, деп хабарлайды Arasha.kz.

Қырғыз Республикасының Конституциялық соты президенттің «Конституцияға өзгеріс енгізу туралы» заң жобасына қатысты ұсынысын қарады. Бұл жоба балаларды зорлау және зорлаумен байланысты адам өлтіру қылмыстары үшін өлім жазасын қолдану мүмкіндігін қарастырғаны сот хабарламасында айтылған.

Сот Конституцияда адам құқықтары мен бостандықтары ең жоғарғы құндылық ретінде қорғалатынын және осы салаға қатысты кез келген өзгеріс Негізгі заңның тұтастығын ескеруі қажет екенін атап өтті.

Президент Садыр Жапаров балалар мен әйелдерге қарсы ауыр қылмыстардың көбеюіне байланысты өлім жазасын қайтару туралы бастама көтерген еді. Бұл әрекет Иссык-Көл облысында 17 жастағы қыздың ұрланып, өлтірілуіне қатысты резонансты оқиғадан кейін күшейе түсті.