Қытай Иранға қарсы экономикалық операцияға байланысты АҚШ қа қатаң мәлімдеме жасады

Қытай Сыртқы істер министрлігінің ресми өкілі Линь Цзянь АҚШ билігінің Иранға қарсы экономикалық операция Ислам Республикасына көмектесетін барлық елдерге бағытталғаны туралы мәлімдемесіне жауап берді, деп хабарлайды Tengrinews.kz РИА Новостиге сілтеме жасап.

Қытайлық дипломаттың сөзінше, Бейжің өзінің заңды мүдделерін табанды түрде қорғау үшін барлық қажетті шараны қабылдайды.

"Қытай өзінің заңды құқықтары мен мүдделерін табанды түрде қорғау үшін барлық қажетті шараны қолданады", - деді Линь Цзянь.

Ол Қытайдың Иранмен ынтымақтастығы әрқашан халықаралық құқық аясында жүзеге асырылатынын және сыртқы араласуға ұшырамауы тиіс екенін мәлімдеді. Оның айтуынша, Бейжің халықаралық құқықта негізі жоқ және БҰҰ Қауіпсіздік Кеңесі мақұлдамаған заңсыз біржақты санкцияларға түбегейлі қарсы шығады.

Линь Цзянь экономикалық қысым бар мәселелерді шешуге ықпал етпейтінін, керісінше қайшылықтар мен қақтығыстарды одан әрі ушықтырып, теріс салдардың таралу қаупін тудыратынын, жаһандық экономикалық және қаржылық тәртіпті бұзып, басқа елдердің заңды құқықтары мен мүдделеріне нұқсан келтіретінін атап өтті.

Бұған дейін АҚШ президенті Дональд Трамп Иранға қарсы "бұрын-соңды болмаған экономикалық операцияның" басталғаны туралы хабарлады. Ол Тегеранға қандай да бір көмек көрсететін "кез келген елдің" өзі "орасан зор экономикалық зардаптарға тап болатынын" ескертті.

Кейінірек АҚШ Қаржы министрлігінің басшысы Скотт Бессент Иран билігі қаржыландырылатын барлық ықтимал табыс көзін бұғаттайтынын айтты.

Google News арқылы жаңалықтарымызды қадағалаңыз