Қытай сөмкесіндегі мәйіт: Ақтөбедегі мектеп маңынан адамның мүрдесі табылды

Ақтөбеде мектептің қасынан адам денесі табылды. Жергілікті тұрғындардың айтуынша, оқиғадан бір күн бұрын қоқыс контейнерлерінің жанынан жағымсыз иіс шығып тұрған үлкен ала сөмкені көрген. Қазіргі уақытта полиция қылмыстық іс қозғап, күдіктіні іздестіріп жатыр, деп хабарлайды Arasha.kz.

Болған жағдай аудан тұрғындарының зәресін алды. Жақын маңдағы дүкендердің біріндегі сатушының айтуынша, мәйіт табылғаннан кейін полиция қызметкерлері сауда нүктелерін аралай бастаған. Тәртіп сақшыларын онда «қытайлық» үлгідегі үлкен ала сөмкелердің сатылған-сатылмағаны қызықтырған, деп жазды Ulysmedia.kz.

– Біз бұл туралы кеше таңертең жұмысқа келгенде білдік. Мәйітті үлкен ала сөмкеге салып, лақтырып кеткенін айтты. Полиция келіп: «Осындай сөмкелер сатасыздар ма?» – деп сұрады. Бізде мұндай сөмкелер бар, бірақ мен оларды екі ай бұрын әкелгенмін және оларды ешкім сатып алған жоқ. Көршілер қатты қорқып қалған, тіпті көшіп кету керек шығар деп айтып жатыр, – деді сатушы.