Қытайдың чип экспортына енгізген шектеулері Қазақстанға әсер етпейді

Қытайдың Nexperia компаниясы чиптерін экспорттауға енгізген шектеулері Қазақстанның автокөлік өндірісіне әсер етпейді.

Бұл жайлы автомобиль нарығын бақылау және талдау агенттігінің директоры Артур Мискарян мәлімдеді. Оның айтуынша, еліміз темір тұлпарларға қажетті қосалқы бөлшектерді Корея, Қытай, Жапония және Еуропа елдерінен импорттайды. Көліктің электроника жүйесінде, қозғалтқыш пен басқару блогында, қауіпсіздік жастықшаларында және мультимедиялық жүйелерінде қолданылатын микрочиптер сол бөлшектердің өзінде орнатылған. Олар негізінен Тайвань, Оңтүстік Корея, АҚШ, сондай-ақ Қытай мен Жапонияда өндіріледі. Бұл өнімдерге деген сұраныс жыл сайын артып отыр. Бұрын қарапайым автокөлік жасауға шамамен 500 чип қажет болса, қазір электронды жүйелердің көбеюіне байланысты олардың саны 4 есе артқан. Еске сала кетейік, Nexperia компаниясына қойылған шектеулерге байланысты түрлі әлемдік өндірушілерге қосалқы бөлшектер жеткізу уақытша тоқтатылған. Сол себепті Nissan, Mitsubishi, Honda және Volkswagen компаниялары өндірісте қиындықтар туындауы мүмкін екенін мәлімдеді. 

Артур Мискарян, Автомобиль нарығын бақылау және талдау агенттігінің директоры:

- Егер Қазақстанға өнім жеткізу туралы Nexperia компаниясына байланысты жағдай тұрғысынан айтатын болсақ, мұнда бір жайтты түсіну керек. Nexperia мен Нидерланд билігі және АҚШ арасындағы бұл дау ең алдымен Еуропа мен Америка нарығына техника шығаратын компанияларға қатысты. Ал Қытайда өндірілетін және сол жақтан әлемнің түрлі елдеріне экспортталатын автокөліктерге бұл шектеулердің әсері болмайды. Сондықтан бұл бағытта ешқандай кедергі болмауы керек. Ал Еуропа мен АҚШ-та жұмыс істейтін және осы аймақтарға автокөлік жеткізумен айналысатын компанияларға келсек, оларда қажетті бөлшектерді жеткізу уақыты кешігуі немесе тіпті тапшылық туындауы мүмкін.