Қытайлық алхимик қоқысты 29 мың долларлық алтынға айналдырды

Хуэйчжоу қаласының тұрғыны, Цяо тегімен танымал шебер екі тонна электронды қалдықты қайта өңдеу процесін көрсетіп, нәтижесінде 191 грамм алтын алынғанын көрсетті. Видео қысқа уақыт ішінде бес миллионнан астам қаралым жинады.

Видео жарияланғаннан кейін қытайлық маркетплейстерде ескі SIM-карталарды сату туралы хабарландырулар саны күрт артты. Лоттардың бірі аз уақыт ішінде 100-ден астам тапсырыс пен 10 мың қаралым жинаған.

Қытайлық әлеуметтік желі қолданушылары Цяоны «Алхимик» деп атап кетті. Бірі бұрын тасталған компьютер қалдықтарын өкінішпен еске алса, енді бірі бұл істің сырт көзге оңай көрінгенімен, шын мәнінде химия саласындағы терең білім мен үлкен тәжірибені қажет ететінін атап өтті.

Өз кезегінде шебер Цяо әуесқойларды бұл процесті үй жағдайында қайталауға болмайтынын қатаң түрде ескертті, себебі ол өмірге қауіпті әрі заңға қайшы болуы мүмкін.

— Мен электронды қалдықтардың белгілі бір түрлерін барлық қажетті сертификаттарға ие бола отырып, заңды түрде қайта өңдеймін. Негізгі мақсатым — өз тәжірибеммен бөлісу, — деді ол.

Қытайда бағалы металдарды қайта өңдеу қызметі арнайы лицензиялауды талап етеді. Заңсыз өңдеу үшін салынатын айыппұл 500 мың юаньға (72 мың АҚШ доллары) дейін жетуі мүмкін, ал қоршаған ортаға зиян келтірілгені дәлелденсе, бас бостандығынан айыру жазасы да қарастырылған.

Бұған дейін алтын бағасы тарихта алғаш рет 5600 АҚШ долларынан асқанын жазған едік.