Қызғалдақ мұра 2026 фестивалі: Нидерланд Корольдігі 40 мың қызғалдақ пиязшығын табыстады

Баспасөз қызметінің мәліметтеріне қарағанда, Іс-шара Туризм және спорт министрлігі бекіткен 2026 жылға арналған ресми күнтізбеге енгізілген. Фестивальдің негізгі мақсаты – оқиғалық туризмді дамыту және елдің мәдени имиджін нығайту.

Фестивальге 6 мыңнан астам адам қатысты. Олардың қатарында Нидерланд, Қытай Халық Республикасы және Моңғолиядан келген инвесторлар мен туристерді қоса алғанда, шамамен 50 шетелдік қонақ бар.

Фестиваль аясында Нидерланд Корольдігінің өкілдері Жамбыл облысына 40 мың қызғалдақ пиязшығын табыстады. Бұл бастама қызғалдақ түрлерін сақтау және өсіру саласындағы халықаралық ынтымақтастықты дамытуға, сондай-ақ өңірдің қызғалдақ туризмі орталығы ретіндегі әлеуетін арттыруға бағытталған.

Іс-шара өңірдің бірегей экожүйесінің ажырамас бөлігі саналатын жабайы қызғалдақтардың гүлдеу кезеңімен тұспа-тұс өтті. Қонақтар үшін гүлдеген алқаптарға арнайы көлік қатынасы ұйымдастырылып, табиғи ландшафттармен және қызғалдақтардың өсу ерекшеліктерімен танысуға мүмкіндік жасалды.

Фестиваль бағдарламасы концерттік қойылымдарды, «Қызғалдақтар патшасының тарихы» атты театрландырылған көріністі, филармония концертін, ұлттық спорт ойындарын, «Қымызмұрындық» дәстүрін және қолөнершілер жәрмеңкесін қамтыды. Сахнада отандық өнерпаздар Серік Ибрагимов, Тоқтар Серіков және Бейбіт Сейдуалиев өнер көрсетті.

Сондай-ақ «Таза Қазақстан» акциясы аясында аумақты тазарту жұмыстары жүргізілді. Фестиваль табиғи қызғалдақ алқаптарын сақтауға, экологиялық және оқиғалық туризмді дамытуға, сондай-ақ туризм саласындағы халықаралық ынтымақтастықты кеңейтуге бағытталды.

Осыған дейін Қостанай облысында Қызыл кітапқа енген сирек қызғалдақ гүлдегені туралы жаздық.