Қызылордада JuniorSkills 2025 республикалық кәсіби біліктілік конкурсы өтті

Жұмысшы мамандықтары жылы аясында Қызылордада JuniorSkills-2025/джуниорскиллс/республикалық кәсіби біліктілік конкурсы өтті.

Оған алғаш рет аудандық, қалалық, облыстық кезеңдерде жеңімпаз атанған мектеп оқушылары қатысты. Жеті өңірден келген командалар бес бағытта сайысқа түсті. Оның ішінде ағаш өңдеу, аспаздық, сән технологиясы, мобильді робототехника, жеңіл көліктерді жөндеу сияқты салалар бар. Екі күн бойы жеткіншектер өз жобаларын көрсетіп, өндірістік тапсырмаларды орындап, командада жұмыс істеу машықтарын шыңдады. Бүгін конкурс қорытындысы шығарылып, жеңімпаздарға марапат табысталды. Ұйымдастырушылардың айтуынша, сайыс оқушылардың жұмысшы мамандықтарына қызығушылығын арттырып, болашақ кәсібін таңдауына көмектеседі. Сонымен қатар жоғары қабілетті, тәжірибелік дағдылары мықты жастардың көзге түсуіне мүмкіндік береді.

Фатима Ақылжан, конкурсқа қатысушы /Ақтөбе қ./:

- Мен барынша дайындалдым. Бірақ бұл сайыста жеңіске жетем деп ойламадым. Бала кезімнен шоколад фабрикасын басқаруды армандайтынмен. Ата-анама әрдайым мен кондитер болам, фабрика директоры болам деп айтатынмын. Аспаздық сүйікті кәсібім. Бүгінгі жеңіс менің балалық арманымды орындаудағы алғашқы қадамым деп санаймын. 

Тілек Ахметқалиұлы, ұйымдастырушы:

- Бұл байқаудың жас қатысушыларға берері өте мол, олар біріншіден әртүрлі өңірден келген қатысушылар арасында біріншіден, тәжірибе алмасады, яғни мамандыққа деген қызығушылығы артады осы арқылы, және де құралдармен жұмыс істеп дағдыланады, осыған дейін алған өздерінің дағдыларын одан әрмен жетілдіруге жақсы мүмкіндік.