Қызылорданың тазалығы тұрақты бақылауда

Қызылордада жеке сектордағы тұрғын үй қасбеттерінің кемшіліктерін ретке келтіріп, санитарлық-норма талаптарын бақылайтын жұмысшы топ тұрақты рейд жүргізіп келеді, деп жазады Egemen.kz.

Кезекті рейдте Ы. Жақаев көшесі, № 83 үйдің алдында құрылыс материалдарының көше бетте жатқандығы анықталды. Ал Т.Есетов көшесі бойындағы тұрғын үй қақпасына ілінген тозығы жеткен билборд дереу алынып тасталды.

Т.Әубәкіров көшесінің бойында заң бұзушылыққа жол берген бірнеше тұрғын үй де назардан тыс қалмады. Құрылыс материалдарын бей-берекет тастап, жаяу жүргіншілер жолын бөгеген, қоқысы шашылып, үйінің төңірегін қамыс басқан тұрғындар да ескерту алды. Беті ашық қалған кәріз құдығының балалар өміріне қауіп төндірген жағдайлары да белгілі болды.

Жұмысшы топ тиісті талаптарды өрескел бұзған үй иелеріне ескерту жасап, кемшіліктерді шұғыл түзеуді тапсырды. Қаланың тазалығына үлес қосып келе жатқан рейд жұмысы күнделікті жүргізіледі.