Рейхстагқа жеткен рух : Ұлттық ұлан сарбазы аталарының ерлік жолын мақтан етеді

9 мамыр — Жеңіс күні қарсаңында ҚР ІІМ Ұлттық ұланы 5573 әскери бөлімінде сарбаздар майдангер аталары туралы естеліктерін бөлісті, – деп хабарлайды Aikyn.kz сайты.

Солардың бірі — Павлодар өңірінен әскерге шақырылған қатардағы Райымбек Игіліков.

Жас сарбаз қаруластарына аталары Ағыбай мен Бұғұбай Игіліковтардың ерлік жолын ерекше мақтанышпен әңгімелеп берген. Оның айтуынша, атасы Ағыбай Игіліков 18 жасында әскер қатарына шақырылып, Фин соғысына қатысқан. 1941 жылы қайта майданға аттанып, Сталинград шайқасынан бастап Польша шекарасындағы ұрыстарға дейін қатысып, Рейхстагқа дейін жеткен. Сапер әрі мерген болған жауынгердің ерлігі «Қызыл Жұлдыз» орденімен, «Ерлігі үшін» медалімен бағаланған.

Ал екінші атасы Бұғұбай Игіліков 1941 жылы соғысқа өз еркімен аттанып, Ленинград бағытындағы қанды шайқастарға қатысады. 1942 жылдың 2 мамырында ауыр жарақат алғанына қарамастан, бірнеше айдан кейін қайта сапқа тұрған. Ленинград блокадасының сұмдығын көзімен көрген майдангер кейін елге оралып, әуе қорғанысы бойынша нұсқаушы атанып, жастарды әскери дайындыққа баулыған.

Райымбектің айтуынша, бала күнінен үйінде Жеңіс күні ерекше аталып өтетін. Отбасында майданнан қалған орден-медальдар мен сарғайған құжаттар сақтаулы. Сондықтан аталарының ерлігі оған әрдайым рух береді.

— «Аталарымыз қазіргі біздің жасымызда қолына қару алып, ел қорғады. Біз сол кісілердің ерлігі мен аманатына лайық болуға тырысамыз», — дейді жас жауынгер.

Бүгінде Райымбек Игіліков Ұлттық ұлан қатарында жауынгерлік қызмет атқарып, қоғамдық тәртіп пен халық қауіпсіздігін қамтамасыз етуге атсалысып жүр. Оның айтуынша, әскери форма киген сайын аталарының жолы мен жауапкершілігі есіне түседі.

Осылайша, Игіліковтар әулетіндегі ерлік рухы ұрпақтан ұрпаққа жалғасып келеді. Кезінде майдан даласында ел қорғаған батырлардың жолын бүгінде олардың ұрпағы бейбіт күнде абыроймен жалғастырып жүр.