Ресей Беларусь аумағына жаңа Орешник зымырандарын орналастыруда Reuters

Америкалық зерттеушілер спутниктен түсірілген суреттерді талдай келе, Ресей Беларусьтің шығысындағы бұрынғы әуебазаға ядролық оқтұмсық тасуға қабілетті жаңа гипердыбыстық баллистикалық зымырандарын орналастырып жатқан болуы мүмкін деген қорытындыға келді. Бұл туралы Reuters агенттігі мәлімдеді, деп хабарлайды Arasha.kz.

Зерттеушілердің пікірінше, нысан Беларусьтің шығыс бөлігінде орналасқан. Бұл Мәскеуге Еуропаның кез келген нүктесіне соққы жасау мүмкіндігін арттыруға жағдай жасайды.

Владимир Путин бұған дейін ұшу қашықтығы 5500 шақырымға жететін орта қашықтықтағы «Орешник» зымырандарын Беларусьте орналастыру жоспарын айтқан болатын.

Сарапшылардың пайымдауынша, бұл қадам — Кремльдің НАТО елдерін Украинаға алыс қашықтыққа ұшатын қару бермеуге итермелеу және Батыстың «агрессивті әрекеттеріне» жауап беру стратегиясының бір бөлігі.

Chatham House сарапшысы Джон Форман бұл әрекетті АҚШ-тың келер жылы Германияда орналастыруды жоспарлап отырған Dark Eagle гипердыбыстық зымырандарына жауап ретінде қарастырады.

Беларусь Қорғаныс министрі Виктор Хренин «Орешник» зымырандарының орналастырылуы Еуропадағы күштер тепе-теңдігін өзгертпейтінін, тек «қорғаныс шарасы» екенін мәлімдеді. Ресей президенті бұл қару-жарақ Беларусь аумағында 2025 жылдың екінші жартысында пайда болуы мүмкін екенін айтқан болатын.