Ресейде екі миллион мүгедек жоғалып кеткені рас па?

Росстаттың ресми статистикасынан «Система» жобасы таңғаларлық дерек тапты. Ведомство мәліметінше, Ресейде 11,1 миллион мүгедектігі бар жан тіркелген. Соңғы жылдары, тіпті ковид індеті мен соғысқа қарамастан, бұл көрсеткіш айтарлықтай өзгере қоймаған. Бұл жерде тек өсімнің жоқтығы емес, көрсеткіштің негізсіз төмендігі де күмән тудырады, деп хабарлайды Arasha.kz.

2025 жылдың жазында Мемлекеттік Думада мүмкіндігі шектеулі жандардың жағдайы туралы баяндама жасаған Ресейдегі адам құқықтары жөніндегі уәкіл Татьяна Москалькова да елде 11,1 млн мүгедек бар екенін айтты. Омбудсмен бұл санға еш күмәнданбаған.

Алайда, Дүниежүзілік денсаулық сақтау ұйымы (ДДСҰ) өзінің 2012 жылғы негізгі баяндамасында әлем халқының орта есеппен 16%-ы мүгедектігі бар жандар екенін көрсеткен. Бұл дегеніміз, халқы 146 млн адамды құрайтын Ресейде шамамен 23,3 млн мүгедек болуы тиіс — яғни омбудсмен келтірген цифрдан екі есе көп.

Тіпті ДДСҰ-ның болжамды есептеріне сүйенбеген күннің өзінде, Росстаттың ресми деректерінен-ақ қайшылықты көруге болады: осыдан сегіз жыл бұрын Ресейде мүгедектер саны 12,2 млн еді, бұл қазіргі көрсеткіштен бір миллионға көп. Ал Мемлекеттік Дума депутаты Олег Смолин (өзі де мүгедектігі бар жан және көп жылдан бері осы топтың мүддесін қорғап келеді) Москальковамен кездесуде осыдан 15 жыл бұрын Ресейде 13 млн мүгедек болғанын — қазіргіден екі миллионға артық екенін абайлап жеткізді.

Соңғы жылдары Ресейде мүгедектер санын едәуір арттыруы тиіс кем дегенде екі ірі оқиға болды: COVID-19 пандемиясы және Ресей әскерінің Украинаға кең ауқымды басып кіруі. Мүгедектігі бар адамдар жүз мыңдап көбеюі керек еді, бірақ керісінше — жүз мыңдап азайып кеткен.

«Система» тілшілері сөйлескен медициналық-әлеуметтік сараптама мамандары, дәрігерлер мен пациенттер бір ауыздан: «Ресей азаматтарына мүгедектікті алу және оны растау айтарлықтай қиындап кетті», — деп мәлімдейді.