Ресейде Қазақстандағы банк тонау ісі бойынша адамдар қамауға алынды

Хабарланғандай, сот 2024 жылғы 11 қарашада Қазақстан Республикасы Павлодар қаласының Орталық полиция бөлімі қозғаған қылмыстық іс аясында төрт адамды қамауға алды. Іс материалдарына сәйкес, «Қазақстан Халық банкі» АҚ бөлімшесінің депозитарийінен зергерлік бұйымдар мен ақшалай қаражат ұрланған. Жалпы келтірілген шығын әртүрлі валютада шамамен 400 млн рубльді құрайды. Ресей азаматтарына аса ірі көлемде ұйымдасқан топ құрамында ұрлық жасады деген айып тағылған.

Қамауға алынғандардың бірі — Иваново облысы Вичуга қалалық округіндегі балалар шығармашылық орталығының күзетшісі. Оның адвокаты Анастасия Терехованың айтуынша, қорғауындағы азаматтың да, басқа айыпталушылардың да тонауға қатысы жоқ.

— Менің қорғауымдағы азамат, оның танысы және тағы екі Ресей азаматы тек сол күні Павлодарда болғаны үшін айыпталып отыр. Басқа дәлелдер жоқ, тіпті екі жұп Ресей азаматтарының өзара байланысы да анықталмаған, — дейді адвокат.

Сондай-ақ адвокаттың мәліметінше, жәбірленушілер — банк те, жеке сейф иелері де — әзірге күдіктілерге залалды өтеу жөнінде талап арыз түсірмеген. Сонымен бірге іс материалдарында 23 Қазақстан азаматына залал келтірілгені көрсетілген.

Тергеу аясында Ресей мен Қазақстанның құқық қорғау органдары өзара ынтымақтастықта жұмыс істеп жатыр.

Еске салсақ, 2024 жылғы 11 қарашаға қараған түні Павлодар қаласында белгісіз адамдар Halyk Bank («Халық банкі») бөлімшесіне қабырғаны бұзып кіріп, зергерлік бұйымдар мен ақшалай қаражатты ұрлап кеткен.

Қаржы нарығын реттеу және дамыту агенттігінің өкілдері банк бөлімшесінен қанша дүние ұрланғанын тергеу ғана айта алатынын мәлімдеген.

Артынша «Қазақстан Халық банкі» акционерлік қоғамының баспасөз қызметі Павлодар қаласындағы бөлімшесіне ұры түсу фактісі бойынша жүріп жатқан тергеу туралы пікір білдірген болатын.

Бұдан бұрын Павлодардағы Halyk Bank-ті тонады деген күдіктілер Ресейде ұсталғанын жазғанбыз.