Республика күні халқымыздың рухын көтеріп, бірлігімізді бекемдейтін мереке сенатор

— 2022 жылғы 16 маусымда Мемлекет басшысы Қасым-Жомарт Кемелұлы Тоқаев Ұлттық құрылтайда Республика күніне Ұлттық мереке мәртебесін қайтаруды ұсынып, ал қыркүйекте бұл бастама заңнамалық деңгейде бекітілді. Президенттің тарихи шешімінің негізінде Республика күні Ұлттық мереке мәртебесін алып, елдің егемендігі мен мемлекеттілігінің айқын символына айналды. Ел Президенті атап өткендей, Республика күні — егемендіктің және Әділетті Қазақстан құру жолындағы бірлігіміздің символы, — деді сенатор Нұрлан Бекназаров.

Оның айтуынша, Конституциялық заңнама, сот жүйесі және құқық қорғау органдары комитеті өз қызметі аясында еліміздің конституциялық құрылысының тұрақтылығын қамтамасыз етуге, заң үстемдігін орнықтыруға, азаматтардың құқықтары мен бостандықтарын қорғауға бағытталған заңнамалық жұмысты жүйелі түрде жүргізіп келеді.

Осы тұрғыдан алғанда, Республика күнін тарихи-құқықтық тұрғыда зерделеу тек мерекелік шара ғана емес, құқықтық мемлекет пен демократиялық институттарды нығайтудың маңызды тетігі болып саналады. Декларацияда бекітілген егемендік, аумақтық тұтастық, заң үстемдігі мен ұлттық бірегейлік қағидаттары бүгін де өзектілігін жоғалтқан жоқ және заманауи мемлекеттік саясаттың құқықтық өзегіне айналды. Республика күні — халқымыздың рухын көтеріп, елдігімізді нығайтатын, бірлігімізді бекемдейтін мереке, — деді ол.

Айта кетелік Республика күні Астанада қандай шаралар өтетіні туралы жазған едік.