Шағын бизнестен түсетін салықтар әкімдіктердің қарамағында қалады Бектенов

Премьер-министр Олжас Бектенов жаңа Бюджет кодексі аясында шағын бизнес субъектілерінен түсетін барлық салық түсімдері жергілікті бюджеттерге аударылатынын мәлімдеді. Бұл туралы ол "Іскер аймақ" ШОБ-ты қолдаудың бірыңғай бағдарламасының жобасын қарау кезінде хабарлады.

Үкімет басшысының айтуынша, жаңа қағидалар жергілікті жерлердегі жұмыс логикасын өзгертеді: енді әкімдіктер кәсіпкерлікті дамытуға тікелей мүдделі, өйткені әрбір бизнестің табысы өңірлік бюджеттердің кіріс бөлігінде көрініс табады.

"Жаңа Бюджет кодексі шағын бизнеске салықтан түсетін барлық түсімдерді әкімдіктердің қарамағында қалдырады. Бұл кәсіпкерлік белсенділіктің өсуі өңірлердің қаржылық базасын нығайтуға тікелей ықпал ететінін білдіреді", - деп атап өтті премьер-министр.

Мұндай шара жергілікті биліктің ШОБ үшін қолайлы жағдай жасауға деген ынтасын күшейтіп, өңірлердің әлеуметтік-экономикалық дамуын жеделдетеді деп күтілуде.

Бүгін, 11:44