Шекара маңындағы Желқуар өзенінде қар суы еріп, тасқын тіркелді

2026 жылғы 26 наурыз күні кешкі 20:00 шамасында Қостанай облысындағы Желқуар өзенінде, Қазақстан Республикасы мен Ресей Федерациясы арасындағы бейтарап аймақта ұзындығы 70 метр, биіктігі 5-10 см болатын еріген қар суының тасуы тіркелді, деп хабарлайды Arasha.kz.

Аталған жағдайға байланысты «ҚазАвтоЖол» ҰК» АҚ облыстық филиалының мамандары су ағынын реттеу және одан әрі тасуды болдырмау бойынша жедел шаралар қабылдады. Жүргізілген жұмыстардың нәтижесінде сағат 22:00-ге дейін су тасуы толығымен жойылды.

Қазіргі уақытта жол қозғалысы қауіпсіздігін қамтамасыз ету мақсатында бейтарап аймақтағы учаскеде тәулік бойы кезекшілік ұйымдастырылды, сигналдық бағаналар мен ескерту белгілері орнатылды. Гидравликалық жүктемені азайту және қайта тасудың алдын алу үшін қосымша қапшықтар орнату жұмыстары жүргізілуде.

Су деңгейі қайта көтерілген жағдайда, KZ10-05 «Мариновкаға кіреберіс» автожолының 9-шақырымында, сондай-ақ Ресей Федерациясы бағытындағы жолда көлік қозғалысын уақытша шектеу енгізілуі мүмкін.

Айта кету керек, аталған су тасу құбылысы жыл сайын қайталанып отырады. Еріген қар сулары толық өткеннен кейін «ҚазАвтоЖол» ҰК» АҚ тарапынан қалпына келтіру жұмыстары жүргізіліп, көлік қозғалысы толық қамтамасыз етіледі.