Шенеуніктерге тағы бір декларация тапсыру міндеті жүктелуі мүмкін

Қазақстанда мемлекеттік қызметшілер үшін жеке мүдделер туралы декларация енгізілуі мүмкін.
Бұл мәселе Сенаттың жалпы отырысында қаралған сыбайлас жемқорлыққа қарсы іс-қимыл мәселелері бойынша заң жобасы аясында талқыланды.

Құжаттағы негізгі жаңалықтардың бірі – мемлекеттік қызметкерлердің жеке мүдделері туралы декларация тапсыру тетігін енгізу.

Сенатор Арман Өтеғұлов қолданыстағы жүйеде мемлекеттік қызметшілер активтері, мүлкі мен табыстары жөнінде декларация тапсырып жүргенін еске салды. Оның пікірінше, жаңа талап есептілікті қайталап, қосымша жүктеме тудыруы мүмкін.

«Бастапқы нұсқада декларация мазмұны нақты көрсетілген еді. Алайда соңғы редакцияда бұл норма алынып тасталып, нысанды бекіту құқығы Үкіметке берілді. Сондықтан жаңа декларацияның мазмұны қандай болады және ол артық есептілікке әкелмей ме деген сұрақ бар», – деді сенатор.

Бұл сауалға жауап берген Мемлекеттік қызмет істері агенттігі төрағасының орынбасары Салауат Мүксімов жаңа декларация қолданыстағы қаржылық есепті қайталамайтынын айтты.

Оның сөзінше, қазіргі декларациялар мемлекеттік қызметшінің табысы, мүлкі мен қаржылық міндеттемелерін қамтиды. Ал ұсынылып отырған жеке мүдделер туралы декларацияның мазмұны өзгеше болады.

«Мүдделер қақтығысы туралы декларация қаржылық жағдайды емес, туыстық байланыстар мен өзге де ақы төленетін қызметтер туралы ақпаратты қамтиды. Бұл құжат жұмысқа қабылданар алдында және қызметкер басқа мекемеге ауысқан жағдайда тапсырылатын болады», – деді агенттік өкілі.

Мүксімовтің айтуынша, декларацияның нақты нысаны Үкімет қаулысымен бекітіледі. Құжатта жеке мүдделермен байланысты тұлғалар және қосымша ақылы қызметтер туралы мәліметтер көрсетілуі мүмкін.

Агенттік өкілінің мәліметінше, заң қабылданған жағдайда оған қатысты нормативтік-құқықтық актілер екі ай ішінде әзірленіп, бекітіледі.