Шоқан фильмі: Меруерт Өтекешова Уәлихановтың әжесін сомдайды

Аты аңызға айналған актриса Меруерт Өтекешова ғалым әрі саяхатшы Шоқан Уәлиханов туралы түсірілетін "Шоқан" атты көркем-деректі драмада рөл сомдайды, – деп хабарлайды Aikyn.kz. 

Фильмнің Instagram-дағы ресми парақшасында жазылғандай, Өтекешова Уәлихановтың әжесі – Айғаным Сарғалдаққызының рөліне бекітілген. 

Картина толықметражды болады. Жақында фильмге арналған онлайн-кастинг аяқталған. Жобаның авторы – журналист Майя Бекбаева. Фильм "Жетісу" телеарнасы үшін Президенттік бастамалар қоры  "Дара" қорының қолдауымен түсіріледі. Алайда картинаның экранға қашан шығатыны әзірге нақтыланбаған.

Тарихшылардың пікірінше, Айғаным Сарғалдаққызы Шоқан Уәлихановтың тұлға болып қалыптасуына үлкен ықпал еткен. Дәл осы әжесі Шоқанды 12 жасында Омбы кадет корпусына оқуға жіберуді қолдаған.

Фильмдегі басты рөлді актер Ерлан Құлмырзин сомдайды. Ол "Сәлем, Еуропа" және "Пацаны" секілді қазақстандық картиналар арқылы көрерменге таныс.