ШҚО да мекеме аумағына Wi Fi роутер мен есірткі лақтырмақ болған азамат ұсталды

Өскемен қаласының тұрғыны Наурыз мейрамы қарсаңында №22 мекемесінің аумағына ерекше иісі бар жасыл түсті өсімдік тектес зат пен Wi-Fi роутер лақтыруға әрекет жасаған. Алайда мекеме қызметкерлері мен Ұлттық ұланның 6699 әскери бөлімінің әскери қызметшілері бірлесіп, күдіктіні №1 учаскенің іргелес аумағынан ұстады.

Жеке тексеру барысында ұсталған азаматтан екі орама өсімдік тектес зат пен зарядтағышы бар Wi-Fi роутер табылды. Тәркіленген заттар экспертизаға жолданды. Егер сараптама нәтижесінде бұл заттар есірткі екенін дәлелдесе, Өскемен тұрғыны қылмыстық жауапкершілікке тартылып, түрме жазасына тартылуы мүмкін.

Департаменттің ресми өкілі Салтанат Даулетбек оқиғаның мән-жайларын толық анықтау үшін қажетті іс-шаралар жүргізіліп жатқанын хабарлады. Қазіргі уақытта барлық материалдар жинақталып, алдағы уақытта сотқа жолданатын болады.

Бұл оқиға тыйым салынған заттарды мекемелер аумағына жеткізуге әрекет жасаған адамдарға қатысты қатаң бақылау мен жауапкершіліктің маңызды екенін тағы бір мәрте көрсетіп отыр.