ШҚО да жер қазып жатып көз жұмған 2 жұмысшыға қатысты тергеу аяқталды

«Нарын КомХоз Сервис» коммуналдық кәсіпорнының екі қызметкері — 42 жастағы дәнекерлеуші Ержан Айтпаев және 55 жастағы темір ұстасы Сергей Кастерин опырылған топырақ астында қалып қаза болған еді. 

Тергеу барысында еңбек қауіпсіздігі талаптарының өрескел бұзылғаны анықталды. Жұмыс беруші кінәлі деп танылып, оған қатысты қылмыстық іс қозғалды.

— Еңбек кодексіне сәйкес, жұмыс беруші қызметкерлердің өмірі мен денсаулығын қорғауға міндетті. Ол топырақтың және техниканың жағдайын алдын ала тексеріп, барлық қауіпті фактор көрсетілген арнайы рұқсатнама-нұсқаулық дайындауы тиіс еді. Әр қызметкер бұл құжатпен танысып шығуы қажет. Егер қауіпсіздік талаптарына сәйкессіздік анықталса, жұмыс бірден тоқтатылуы керек болатын, — деді ШҚО мемлекеттік еңбек инспекциясы басқармасының басшысы Бақытбек Кизатов.

Еске салсақ, осыған дейін Жезқазғанда коммуналдық желілерді жөндеу кезінде жұмысшы қаза болғаны хабарланған.