Шымкентте жаңа жылыжайдан алғашқы өнім алынды

Шымкентте жаңа жылыжай шаруашылығында алғашқы қызанақ өнімі жиналды.

Қазақстан мен ТМД кеңістігіндегі ең ірі жоба шетелдік инвесторлардың қатысуымен жүзеге асып жатыр. Жылыжайдың жалпы аумағы 650 гектар. Бір жыл бұрын ғана бұл жер бос жатқан дала еді. Бүгінде Шымкенттегі ең ірі жылыжай кешенінің бастапқы кезеңіндегі алғашқы өнім жиналып жатыр.

Айдарбек Сапаров, ҚР Ауыл шаруашылығы министрі:

- Былтыр «Аларко» компаниясы бір жылдың ішінде қаншама жұмыс істеп тастаған. Бүгін ашылуына жиналып отырмыз. Мен мемлекеттің атынан осы кісілерге, инвесторларға үлкен алғыс білдіргім келеді.

Жобаның сәтті жүзеге асуына 650 млн АҚШ доллары көлеміндегі инвестиция және мемлекет пен бизнестің тиімді әріптестігі оң септігін тигізді.

Айдын Кәрімов, Шымкент қаласы әкімінің бірінші орынбасары:

- Бұл тек ТМД кеңістігіндегі үлкен жылыжай ғана емес, сонымен қатар еліміздің тамақ өнеркәсібі, Агроиндустрия саласындағы үлкен стратегиялық қадам.

Кешен толық іске қосылған кезде қуаты жылына 155 мың тонна көкөніс өндіруге жетпек. Бұл өңірдің азық-түлік қауіпсіздігін қамтамасыз етуге жол ашады,- дейді сала мамандары.

Талғат Мекамбаев, Шымкент қаласы Ауыл шаруашылығы және ветеринария басқармасының басшысы:

- Екінші кезеңі бар. Бұдан 2 есе шамамен үлкен, 430 га. Оның жұмысын аяқтап, бұл тек қана ішкі нарықты қамтамасыз етпей, сонымен қатар экспорттық потенциалды да көбейтеді.

Кешен аумағында өз зертханасы бар агроакадемиялық орталық ашылады. Онда осы салаға қажетті мамандар даярланады. Инвесторлар сондай ақ жақын маңдағы Қайнар Бұлақ тұрғын алабында балабақша салуды жоспарлап отыр.

Авторлары: Талғат Серікқалиұлы, Катерина Попкова, Нұрмахан Мұсатов, Нұрмахан Бекмұратов