Шымкенттік кітапқұмар оқушы білімімен таңғалдырды

Шымкенттік Әлтайыр Ерназаров 12 жасында-ақ, 600-ден астам кітап оқыған. Бес жасынан кітапқұмар бала қазақша ғана емес, орыс, ағылшын тілдеріндегі шығармаларды да байыптап, әлем әдебиетінің озық туындыларын парақтап жүр.

Өзің айтуынша, әр кітап – жаңа әлем, тың оқиға, өмірлік сабақ. 

Қатарластарына қарағанда Әлтайырдың кітапқа деген ынтасы ерте оянған. Әдебиеттің түрлі жанрын таңдамай оқи береді. Фантастика, классика, психология мен тарихи романдарға қызығады. Кітап оқу арқылы қиялы мен ой ұшқырлығын дамытқан ол бүгінде ағылшын тілінде еркін сөйлейді.

Әлтайыр Ерназаров, оқушы:

- Менің ойымша 650 кітап оқу онша қиын емес. Себебі бір нәрсені жақсы көргенде істей аласың ғой. 

Ол көбіне электронды форматтағы кітаптарды оқиды. Жеке құрылғысында 500-ге жуық шығарма сақталған. Ал кітапханадан алған кітапты бірнеше күнде оқып, уақытынан бұрын тапсырады. Кітапханашының айтуынша, пікір алмасып, талқылағанды жақсы көредІ. 

Әйгерім Өтегенова, кітапханашы:

- Бос уақытында біздің кітапханадан шықпайды. Ең үздік оқырмандарымның бірі деп білемін. Сондай-ақ Әлтайырдың қабілеттілігі ауыр тақырыптағы кітаптарды да алып оқитынын байқадым. Біз көбіне екеуміз пікір алмасамыз. Сол кезде оның ойын біліп отырамын.

Мамандар Әлтайырдың кітапқа деген құштарлығын құптайды. Оның бет алысы смартфонға тәуелділік артқан заманда қатарластарына үлгі болар қасиет деп санайды. Өйткені кітап баланың таным көкжиегін кеңейтіп, логикалық ойлауын, сөз саптауын, қиял жүйесін дамытады.

Салтанат Асанова, психолог:

- Бала ішкі қажеттіліктерін, барлық әлемді танудағы сұрақтарын осы кітап арқылы алуы – қалыпты. Яғни баланың нағыз IQ дамытуы осы кезде болып табылады.

Әлтайыр үшін кітап оқу күнделікті әдет. Жеке бөлмесі шағын кітапханаға айналған. Спортқа да көңіл бөліп, семсерлесу мен жүзуге қатысып жүр. Келешекте өзі де жазушы болуды армандайды.

Авторлары: Нұрсұлтан Мұхамеджан, Нұрмахан Бекмұратов