Солтүстік Қазақстанда 14 адам мессенджер арқылы алаяқтардың құрбаны болды

Қазақстандықтарға Telegram және WhatsApp аккаунттарын бұзуға байланысты кибералаяқтықтың жаңа толқыны туралы ескерту жасалды. Алаяқтар «байқауда дауыс беру» және «жеке фотосуреттерге» қатысты сілтемелерді пайдаланып жүр.

Киберқылмысқа қарсы іс-қимыл басқармасының мәліметінше, Солтүстік Қазақстан облысының өзінде жаңа алаяқтық схемасынан зардап шеккен 14 адам тіркелген.

«Балаға дауыс беріңіз»

Пайдаланушыларға танысының атынан балалар байқауында қызға немесе ұлға дауыс беру туралы өтініш жазылған хабарлама келеді. Балалардың есімдері үнемі өзгеріп отырады. Хабарламаға фишингтік сілтеме қоса беріледі.

Аккаунтты басып алу

Сілтемеге өткен сәтте мессенджердегі аккаунт бұзылуы мүмкін. Ал оның шынайы иесі өз профиліне кіру мүмкіндігінен айырылады.

Ақша сұрап хабарлама тарату

Бұзылған аккаунттың атынан алаяқтар байланыстағы адамдардың барлығына ақша аударуды сұрап, жаппай хабарлама жібере бастайды.

Мысалы: «Өтінемін, 80 мың теңге жібере тұршы, кешке қайтарамын, есепшот бұғатталып қалды».

Қауіпті «фотосуреттер»

Сондай-ақ «Мына суреттегі сен емессің бе? Мұны не үшін түсірдің?» деген мазмұндағы хабарламалар да таралып жүр. Мұндай сілтемеге өту құрылғыға зиянды бағдарламаның орнатылуына әкелуі мүмкін.

«Танымал WhatsApp-ты қоса алғанда, кез келген мессенджердің осал тұстары болуы мүмкін. Мынаны білу маңызды: танысыңыздың қосымшасы бұған дейін бұзылып қойған болуы ықтимал. Адамға қаншалықты сенсеңіз де, ол күмәнді сілтеме жіберсе, міндетті түрде ұялы байланыс арқылы өзіне қоңырау шалып, бұл хабарламаны шынымен жіберген-жібермегенін нақтылаңыз», — деп түсіндірді СҚО полиция департаменті бастығының бірінші орынбасары Әлібек Құжахметов.

Күмәнді сілтемелерге өтпеңіз. Оларды жақын досыңыз немесе туысыңыз жіберсе де, ашпаңыз.

Ақпаратты тексеріңіз. Егер сізден ақша сұраса немесе «дауыс беруді» ұсынса, сол адамға кәдімгі ұялы байланыс арқылы тікелей қоңырау шалыңыз.

Екі факторлы аутентификацияны қосыңыз. Telegram және WhatsApp қосымшаларындағы «Баптаулар» — «Құпиялылық/Қауіпсіздік» бөлімдерінен қосымша қорғаныс орнатыңыз. Бұл SMS арқылы растау кодын алған жағдайда да алаяқтардың аккаунтыңызға кіруіне кедергі келтіреді.

Бүгін, 14:25