SOS сигналы Алматы тауларында бір адамның өмірін сақтап қалды

Таудағы жай ғана серуен жас жігіт үшін қайғылы жағдаймен аяқталуы мүмкін еді. «Мыңжылқы» үстіртінен түсіп келе жатқан туристер тобы қараңғыда SOS белгісін беріп тұрған жарықты байқайды. Қашықтық алыс болғандықтан, айқайлаған дауыс естілмеген. Құтқару қызметі мен ТЖМ «Барыс» жасағы дереу көмекке аттанған,  – деп хабарлайды Aikyn.kz.

Құтқарушылар оқиға орнына жетіп, жартаста тұрып қалған адаммен дауыс арқылы байланыс орнатты. Белгілі болғандай, 1996 жылы туған азамат ешқандай дайындықсыз және жабдықсыз тік жартасқа шықпақ болған.

Жігіт жотамен жалғыз келе жатып, тайып кеткен. Құлау кезінде ішінде жылы киімдері бар рюкзагі төмен ұшып кеткен. Ол тек спорттық костюммен және қолындағы кішкентай фонарьмен тар белдеуде қалып қойған. Өз бетінше түсе алмаған соң, SOS сигналын бере бастаған.

5 сағатқа созылған күрделі өрмелеуден кейін құтқарушылар зардап шегушіге жетті. Оны құтқару үшін мамандар кәсіби сақтандыру құралдарын қолданып, жартастың жоғары жағынан түсу арқылы күрделі маневр жасады. Құтқарушылар жігітке ыстық шай беріп, үстіне жылы күртеше кигізді, содан соң аман-есен төменге түсірді. Медициналық көмек оған қажет болмады.

Құтқару қызметі ескертеді: Тау немқұрайлылықты кешірмейді. Арнайы жабдықсыз, дағдысыз және байланыс құралынсыз шығу — өз өміріңізге де, құтқарушылардың өміріне де үлкен қауіп. Төтенше жағдайда телефон қуаты мен қарапайым фонарь сіздің аман қалуыңызға көмектесетін жалғыз мүмкіндік болуы мүмкін.