СҚО да комиссия жасөспірімнен мүгедекті заңсыз алып тастаған

СҚО сотының мәліметінше, әділдік іздеп сотқа баланың анасы жүгінген. Әйел баласының ерте жастан бері созылмалы дерт – ювенильді идиопатиялық артритпен ауыратынын айтқан. Бұл дертте әдетте буындар ауырады, қимыл-қозғалыс шектеліп, аяқ-қол деформацияға ұшырауы мүмкін. Осыған байланысты бала тұрақты түрде медициналық бақылауда болып, ұзақ уақыт ем қабылдаған. Сонымен қатар оған тізе буындарына ота жасалып, үйде оқыту тағайындалған. 

Алайда өткен жылдың қазан айында қайта куәландырудан өту кезінде өңірлік сараптамалық комиссия баланың мүгедектігін растаудан бас тартқан. Комиссия өз шешімін ағза функцияларында тұрақты бұзылыстардың жоқтығымен түсіндірген.

Істі қарау барысында сот сараптама жүргізу кезінде бірқатар процессуалдық заңбұзушылық болғанын анықтады. Мәселен, тексеруге міндетті мамандар – ревматолог, травматолог және ортопед қатыстырылмаған. Яғни, комиссия шешімді тиісті бейінді сарапшыларсыз қабылдаған.

Бірінші сатыдағы сот комиссияның шешімін заңсыз деп танып, оның күшін жойды. СҚО соты әкімшілік істер жөніндегі сот алқасы бұл қорытындымен келісіп, рәсімнің сақталмауы шешімнің заңдылығына елеулі әсер еткенін атап өтті. 

Сот қаулысы заңды күшіне енді. 

Бұған дейін ШҚО әкімінің бірінші орынбасары Жақсылық Омардың 6 жылға сотталғанын жазған едік.