СҚО да көші қон мәселесі талқыланды

Солтүстік Қазақстан облысында «Еңбек» бағдарламасы бойынша көшіп келетін азаматтарға үй алуға бөлінетін қаржы көлемі ұлғайды.

Келер жылдан бастап оларға баспаналы болуға 6,5 млн теңге бөлінеді. Көші-қон мәселесі премьер-министрдің кеңесшісі Ералы Тоғжановтың қатысуымен өткен кеңесте талқыланды.

Биыл елімізде қандастар мен қоныс аударушыларды қабылдауға 10 мыңға жуық квота бөлінді. Оның бір шоғыры Солтүстік Қазақстан облысына көшіп келуі тиіс. Оларға мемлекет тарапынан әлеуметтік жәрдемақы мен үй алуға қаржылай қолдау көрсетіледі. Сонымен қатар кәсіп ашуға грант беріледі.

Нұрбол Мұқашев, Қарағаш ауылының тұрғыны:

- Маңғыстау облысы Мұнайлы ауданынан көшіп келдім. Мал шаруашылығымен айналысып жатырмын. Қазір субсидия, гранттарды алып әрекет жасап жатырмын. Бала – шағам осында оқып жатыр. Келіншегім мектепте жұмыс істейді.

Ішкі көші-қонға «Серпін» бағдарламасы тың серпін берді. Мәселен, Петропавлдағы Манаш Қозыбаев атындағы университетіне еліміздің 6 өңірінен 1800-ге жуық мектеп түлегі оқуға түсті. Оның әрбір бесіншісі осында қалған.

Аружан Ермұқан, студент:

- Бұл жақта мүмкіндіктер өте көп. Сабақтардың барлығы ағылшын тілінде өтеді. Бұл – ағылшын тілін жетік меңгеруге үлкен мүмкіндіктер. Халықаралық профессорлар және олар біздің стартаптарымызға мэтрлік жасауы. Сонымен қатар 4-ші курста Аризона университетіне барып тәжірбие алмасу. Ол болашаққа үлкен мүмкіндіктерге жол ашады деп ойлаймын.

Көші – қон мәселесі премьер-министрдің кеңесшісі Ералы Тоғжановтың қатысуымен өткен кеңесте талқыланды. Солтүстік Қазақстан облысына «Еңбек» бағдарламасы бойынша 2016 жылдан бері 18 мың адам көшіп келген. Оларға ел қазынасынан 13 млрд теңге бөлінді. Жиында квотаны әр өңірдің ерекшелігіне қарай бөлу керегі айтылды. 

Ералы Тоғжанов, ҚР премьер-министрінің кеңесшісі:

- Әрбір облыстарға бөлінген квотаның деңгейі әртүрлі екенін өздеріміз де көрдік. Олай болатын болса, 8 облысқа бөлінетін квотаның деңгейі халықтың әлеуметтік-экономикалық жағдайына байланысты қарастырылу керек. Ол шекаралас жатқан аудандарға, ауылдарға тікелей қатысы бар.

Одан кейін Үкімет басшысының кеңесшісі «Ауыл аманаты» жобасына қатысты жиын өткізді. Қазір бұл бағдарламаға 50 млрд теңге қарастырылған. Бұл ауыл тұрғындарының жеке кәсіп ашып, өзімізде шығарылатын өнімдердің үлесін арттыруға мүмкіндік береді.

Авторлары: Айдарбек Айтмұхамбетұлы, Қуаныш Қазбеков