Су тасқынынан кейінгі серпіліс: Махамбет даласы өнімді еселеді

Махамбет ауданында биылғы егіс маусымы ерекше қарқынмен өтуде. Өткен жылы су тасқыны салдарынан егіс жұмыстары тұралап қалған еді. Ал биыл дала еңбеккерлері екі есе күшпен іске кірісті. 

2025 жылы аудан бойынша 5 082 гектар жерге егіс жүргізілді — бұл өткен жылмен салыстырғанда екі есеге жуық артық көрсеткіш.

Атап айтқанда, 219 гектарға картоп, 1 036 гектарға көкөніс, 516 гектарға бақша өнімдері, ал 3 311 гектарға мал азықтық дақылдар егілген. Оның ішінде 1 771 гектар тауарлы егіс алқаптарында тамшылатып суару технологиясы толықтай енгізілген. Бұл әдіс енді тәжірибе емес, қалыпты жұмыс тәсіліне айналды.

Жиын-терім науқаны қызу жүріп жатыр. Қазіргі таңда 4 566 гектардан 72 мың тонна өнім жиналды. Картоп, көкөніс, бақша және мал азығы қоймаларға, базарларға жөнелтілуде. Егін жинау жұмыстарына тек механизаторлар ғана емес, жергілікті тұрғындар да тартылған. «Дастан» және «ҚызанаАГРО» шаруашылықтарында 60-қа жуық адам еңбек етуде.

- Егін жинаумен қатар келер жылға дайындық та басталып кетті. Қазір күзгі сүдігер жырту жұмыстары жүргізілуде. Күннің ашық-жарығын тиімді пайдаланып жатырмыз, — дейді аудандық ауыл шаруашылығы бөлімінің басшысы Олжас Мырзабаев.

Егер ауа райы қолайлы болса, жиын-терім 2 қарашаға дейін толық аяқталады деп күтілуде. Бұл маусым — былтырғы қиындықтардан кейінгі қалпына келу кезеңі ретінде есте қалмақ.

Ләззат ҚАРАЖАНОВА

Бүгін, 17:35