Сұраныста сапалы қызмет

Кейінгі жылдары мемлекет тарапынан кәсіп ашамын деген азаматтарға жан-жақты мүмкіндік жасалып отыр. Тиімді несие, қайтарымсыз грант секілді бағдарламалардың түр-түрі бар. Ең бастысы, кәсіп көзін тауып, жобаңызды комиссия алдында қорғап шықсаңыз болғаны.

Өскемен қаласының тұрғыны Индира Әзілбаева «Бизнес бастау» бағдарламасы арқылы қайтарымсыз грант алып, жарнама агенттігін ашқан. Айтуынша, мемлекеттен берілген қаржыға лазерлі станок сатып алған, безендіру жұмыстарының сан түрімен айналысады. Жейдеге сурет басудан бастап, мектеп пен балабақшалардың көрнекілік, ақпараттық құралдарына дейін әзірлейді. Кәсіп көзін дөп баса тапқан көпбалалы ананың өндіріп жатқан жұмысына сұраныс баршылық. Көрсетіліп жатқан қызметтің қай түрі де сапалы.

«Қарап отырсақ, еліміздің дамуы көш ілгері. Қарапайым ғана мысал айтайын, балаларымыз тегін оқиды, тегін медициналық көмек аламыз. Білімі жетсе, жоғары оқу орнында да тегін оқиды. Кәсіпкерлікке де қолдау мол. Мен секілді шағын кәсіпкерлікті қолға алғандардың кеңеюіне жан-жақты жағдай жасалып жатыр», дейді Индира Ерғалиқызы.

Көп жыл декреттік демалыста отырған ол алғашында мемлекеттік грантқа іліне алмаған. Алған беттен қайтпайтын қайсар ана екінші рет тәуекел еткен. Арнайы жасақталған комиссияға барлық жұмысты, өзіне қажетті аппараттың қуатын көрсеткен. Сөйтіп, комиссия көзі жеткен соң, грант бөлді. Кәсіптің келешегі барын байқаған өмірлік серігі қосымша баннер шығаратын станок пен киімге сурет басатын құрылғы сатып алып берген. Жұмысты ұршықша иіріп әкетуінің себебі, Индира өзі оқушы кезінен сурет салуға жақын еді. Қабырға газеттерін шығарып, мектептегі безендіру жұмыстарына атсалысып жүретін. Жоғары оқу орнында алған білімі шығармашылықтан алшақтау. Мамандығы – алғашқы әскери дайындық пәнінің мұғалімі. Он шақты жыл декреттік демалыста отырып, жұмыс істеуге мұршасы болмаған соң, кәсіп ашуды ұйғарған. Бұған дейін кәсіптің әр түрімен айналысып та көрген.

«Күршім ауданында туғаныммен, Көкпектінің Үлкен Бөкен ауылында өстім. Оқуымды тәмамдаған соң, шамалы уақыт әскери комиссариатта жұмыс істедім. Тұрмыс құрдым, балалы-шағалы болдым. Жарым үнемі қолдау көрсетіп отырады. Екінші анам балаларға қарайды. Шығар­машылық адамы болғандықтан, қазіргі кәсібім жаныма жақын. Дегенмен кез келген кәсіпті бастамас бұрын бағыт-бағдар беруші адам керек. Ол жағынан маған жол көрсеткен туысқан ағам Жасұлан еді. Ол да жарнама агенттігін ұстап отырған азамат»,  дейді кәсіпкер.   

Индира кітап оқуды жақсы көреді. Оның ішінде адамға күш беретін, жігерлендіретін шығармаларды іздейді. Өзінің осы уақытқа дейінгі көрген-білгенін кейінгі жастарға да үйреткісі келеді. Жастар да көбірек кітап оқыса екен деп тілейді. Әр сәт маңызды деп санайды. Өзі болса жұмысын жүйелі атқарып, уақытты ұтымды пайдаланып жүр.

ӨСКЕМЕН