“Сұрақтар туындауы мүмкін“. Қандай сатып алулар салықшыларды қызықтыратынын Қаржы министрлігі айтты

Салық органдары ресми табыс көзі болмаса да, қымбат заттар сатып алатын қазақстандықтардан түсініктеме талап етуі мүмкін. Бұл туралы ОКҚ брифингінде қаржы вице-министрі Әсет Тұрысов еске салды, деп хабарлайды Tengrinews.kz тілшісі.

Журналистер Қазақстанда азаматтардың табысы мен шығысы тұрақты түрде салыстырылып отыра ма және алшақтықтар анықталған жағдайда түсініктеме талап етіле ме деген сұрақ қойды.

Вице-министрдің айтуынша, Smart Data Finance жүйесінің жұмыс істеп тұрғанына екі жылға жуықтады. Онда қолда бар деректерді талдауға мүмкіндік беретін жеке және заңды тұлғалардың цифрлық профильдері қалыптастырылған.

"Біз бұл кезеңнен өттік, автокөліктер мен жылжымайтын мүлік бойынша хабарламалар жібердік. Егер қандай да бір сұрақтар туындаса, заңнамаға сәйкес қажетті жұмыстарды жүргіздік. Меніңше, бұған алаңдаудың қажеті жоқ", - деді Тұрысов.

Ол ақпарат салықтық циклдар аясында, соның ішінде салық есептілігін тапсыру мерзімдерін ескере отырып қайта тексерілетінін түсіндірді.

Журналистер фискалдық органдар қазірдің өзінде қазақстандықтардың табысы мен шығысының сәйкестігін тексеріп жатқаны рас па екенін және ақшаның қайдан келгенін түсіндіре алмағандарға не болатынын нақтылады.

Вице-министр салықшылардың күмәнін тудыруы мүмкін жағдайға мысал келтірді.

"Мысалы, егер сенің үйің, пәтерің, бес-алты көлігің болса және оларды кейінгі екі-үш жылда сатып алсаң, бірақ ешқандай табыс көзің мен жалақың болмаса, әрине, тиісті сұрақтар туындайды", - деп түсіндірді Тұрысов.

Сонымен қатар ол азаматтардан табыс көздері туралы мәлімет сұрату мүмкіндігі бұрын да болғанын атап өтті. Тиісті тәртіп Салық кодексінде қарастырылған.

Тұрысовтың айтуынша, заңнамада табыс көзін растай алмайтын азаматтарға қатысты түрлі шаралар қарастырылған. Алайда вице-министр нақты қандай салдарлар болуы мүмкін екенін ашып айтпай, бұл сұрақты Мемлекеттік кірістер комитетіне жолдауды ұсынды.

"Егер жалақың мен табыс көзің болмаса, бірақ соңғы бір жылда пәтер, көлік және тағы басқаларды сатып алсаң, саған сұрақтар қойылады", — деп қайталады ол.

Сонымен бірге Қаржы министрлігі ауқымды деректерді (big data) пайдалану ықтимал заңбұзушылықтарды анықтап қана қоймай, қазақстандықтардың салық органдарымен өзара іс-қимылын жеңілдетуге мүмкіндік береді деп үміттенеді. Мысалы, жүйе декларацияларды толтыру үшін ақпаратты алдын ала ұсынып, алынған хабарламадағы салық сомасының қалай есептелгенін түсіндіре алады.

Бұған дейін Әсет Тұрысов үкіметте Қазақстандағы салық мамандары азаматтардың табысын олардың шығыстарымен салыстыратынын айтқан болатын. Егер адамның ресми табысы аз болып, бірақ ол қымбат мүлік сатып алса, одан ақшаның қайдан келгені сұралуы мүмкін.

Тағы оқыңыз: “Әр адамға жеке құжаттама жасалды“: салық органдары қазақстандықтар туралы не біледі?

Бізді Google-дың негізгі дереккөздер тізіміне қосыңыз