Табельдік қаруды тартып алған: Өскеменде бұзақылар полицейге оқ атты

АСТАНА, 24 наурыз – Sputnik. Өскемен қаласында полицейге оқ атқан бұзақылар ұсталды, деп хабарлайды Sputnik Қазақстан тілшісі.

Облыстық полиция департаменті ұсынған ақпаратқа сәйкес, 22 наурызда Сағадат Нұрмағамбетов көшесінде бір жасөспірім патрульдік полиция қызметкерінен көмек сұраған. Екі бейтаныс ер адам оған дөрекі мінез танытқан.

Полиция қызметкері бұзақыларды тапқан. Олар мас болған және тәртіпке бағынбаған. Тіпті тәртіп сақшысының заңды талаптарын елемей, оған шабуыл жасаған және полицейдің табельдік қаруын алып қойып, оған оқ атқан. Одан кейін оқиға орнынан қашып кеткен. Жарақат алған тәртіп сақшысы ауруханаға жеткізілді.

"Жедел іздестіру шаралары барысында екеуі де қысқа мерзімде анықталып, ұсталды. Қару тәркіленді. Қазіргі уақытта күдіктілер уақытша ұстау изоляторына қамалды", - дейді полицейлер.

Қазіргі кезде билік өкілінің қызметтік міндеттерін атқаруына байланысты оның өміріне қауіп төндіру фактісі бойынша қылмыстық іс қозғалды.