Талдыкөл, Greenline, Мыңжылдық Астананың қай аумақтарында жаңа саябақ ашылады

Оның айтуынша, Астанада бір Ботаникалық бақ, 14 парк, 8 бульвар және 127 сквер жұмыс істейді. Былтыр 2025 жылы елордада қоғамдық кеңістіктерді абаттандыру және көгалдандыру бойынша 8 жоба іске асырылған. Атап айтқанда, Мәңгілік Ел даңғылындағы учаске мен Президент паркі, Есіл өзенінің жағалауы реконструкцияланған, Сығанақ көшесінің бойы абаттандырылған, Greenline аллеясының бірінші кезегі салынған.

– Биыл басқарма 10 қоғамдық кеңістікті абаттандыруды жоспарлап отыр. Олардың ішінде Мыңжылдық аллеясының бірінші кезеңінің құрылысын бастау, Қ.Қуанышбаев театрының артында сквер, теміржол вокзалы маңында сквер салу бар. Сондай-ақ Greenline бульварының екінші кезеңінің құрылысы басталады. Бұл Омаров көшесінен Күлтегін көшесіне дейінгі және Әнет баба көшесінен Төле би көшесіне дейінгі игерілмеген аумақтарды қамтиды. Жалпы осы аудан бойынша бүкіл үлкен аллеяны толық аяқтау жоспарланған, – деді басқарма басшысы елорда мәслихатында құрылыс мәселелері жөніндегі тұрақты комиссияның отырысында.

Тағы бір маңызды жоба — Талдыкөлдің бесінші учаскесіндегі Экосаябақтың құрылысын бастау. Оған қоса, Триатлон паркі мен Бейбітшілік пен келісім паркінің реконструкциясы да қарастырылған.

Ш.Қалдаяқов көшесін Тәуелсіздік даңғылынан Нұрлы жол теміржол вокзалына дейін көгалдандыру жұмыстары да жүргізіледі. Соңғы жоба — Қабанбай батыр даңғылында LRT желісі бойымен веложол мен тротуар салу. Аталған жолдар стелладан Сығанақ көшесіне дейін жалғаспақ.

Бұған дейін Астана әкімі Жеңіс Қасымбек Кіші Талдыкөлдегі экопарк құрылысының не себепті биылғы көктемде басталмағанын түсіндірген еді.