Талдықорғанда жүргізуші 3,5 млн теңге айыппұл төлемеген

АСТАНА, 10 қаңтар – Sputnik. Талдықорғанда айыппұл қарызы миллиондаған теңгеге жеткен жүргізуші анықталды, деп хабарлайды Жетісу облыстық полиция департаменті.

Жүргізуші "Қорғау" мобильді қосымшасы арқылы анықталған.

Полицейлер Sorento маркалы автокөлікті тоқтатқан. Көлікті Ескелді ауданының 24 жастағы тұрғыны басқарған.

"Тексеру барысында соңғы бір жыл ішінде Алматы қаласы, Алматы облысы және Жетісу облысы аумағында аталған көлікке қатысты жол қозғалысы ережелерін бұзу фактілері бірнеше рет тіркелгені анықталды", - дейді полицияда.

Төленбеген әкімшілік айыппұлдардың жалпы сомасы 3 578 120 теңгеге жеткен. Автокөлік Талдықорған қаласындағы арнайы айып тұрағына қойылды.